તિરુવનંતપુરમ: ભારતીય ક્રિકેટ ટીમના સ્ટાર વિકેટકીપર બેટ્સમેન સંજુ સેમસન અને કોંગ્રેસના દિગ્ગજ નેતા શશી થરૂર વચ્ચેના સંબંધો માત્ર રાજકીય કે ઔપચારિક નથી, પણ પારિવારિક છે. તાજેતરમાં એક ઈન્ટરવ્યુ દરમિયાન શશી થરૂરે ખુલાસો કર્યો હતો કે તેઓ સંજુને ૧૪ વર્ષની ઉંમરથી ઓળખે છે અને તેની સાથે એક કાકા જેવો આત્મીય સંબંધ ધરાવે છે. થરૂરે યાદ કર્યું કે જ્યારે સંજુ કિશોર અવસ્થામાં હતો, ત્યારે જ તેમણે ભવિષ્યવાણી કરી હતી કે આ છોકરો એક દિવસ મહેન્દ્ર સિંહ ધોની જેવો મહાન ખેલાડી બનશે.
ગૌતમ ગંભીરનો એ જડબાતોડ જવાબ
થરૂરે હસતા હસતા એક કિસ્સો સંભળાવ્યો કે જ્યારે તેમણે સંજુને 'બીજો ધોની' કહ્યો, ત્યારે વર્તમાન કોચ ગૌતમ ગંભીરે તેમને અટકાવ્યા હતા. ગંભીરે બહુ સચોટ વાત કહી હતી કે, "સંજુને કોઈ બીજો (ધોની) બનવાની જરૂર નથી. તે પોતાની સ્ટાઈલનો પહેલો અને એકમાત્ર 'સંજુ સેમસન' બનશે." થરૂરે સ્વીકાર્યું કે ગંભીરની વાત સાચી પડી છે, આજે સંજુએ પોતાની આગવી ઓળખ ઉભી કરી છે અને તાજેતરના T20 વર્લ્ડ કપની છેલ્લી ત્રણ મેચોમાં જે રીતે અણનમ ૮૯-૮૯ રનની ઇનિંગ્સ રમીને ભારતને ચેમ્પિયન બનાવ્યું, તે કાબિલ-એ-તારીફ છે.
વર્લ્ડ કપમાં સેમસનનો જાદુ અને થરૂરની લાગણી
શશી થરૂરે સંજુના પ્રદર્શનના વખાણ કરતા કહ્યું કે, "વર્લ્ડ કપ દરમિયાન તે અત્યંત શાંત અને રમત પર ધ્યાન કેન્દ્રિત કરતો દેખાયો. તેને બેટિંગ કરતો જોવો એ એક લ્હાવો છે." તેમણે વધુમાં ઉમેર્યું કે સંજુ જ્યારે પણ મેદાનમાં ઉતરે છે ત્યારે તેની આંખોમાં એક અલગ જ આત્મવિશ્વાસ હોય છે. થરૂર હવે ઈચ્છે છે કે સંજુ સેમસન માત્ર T20 જ નહીં, પણ વનડે (ODI) ટીમમાં પણ કાયમી સ્થાન મેળવે અને ભવિષ્યમાં ભારત માટે સફેદ જર્સીમાં ટેસ્ટ ક્રિકેટ પણ રમે.
મેદાનની બહારની શિસ્ત અને જન્મદિવસનો ફોન
સેમસનની શિસ્ત વિશે વાત કરતા થરૂરે જણાવ્યું કે મેચ દરમિયાન સંજુ કોઈનો ફોન ઉપાડતો નથી, પરંતુ તે દર વર્ષે થરૂરને તેમના જન્મદિવસે અચૂક ફોન કરીને શુભેચ્છા પાઠવે છે. થરૂરે કહ્યું, "તે ખૂબ જ સંસ્કારી અને લાયક યુવાન છે. જ્યારે તેનો ખરાબ સમય ચાલતો હતો ત્યારે પણ હું તેની સાથે હતો અને મને પૂરો વિશ્વાસ હતો કે તેની પ્રતિભા તેને ટોચ પર લઈ જશે."
CM પદની અટકળો પર પૂર્ણવિરામ
બીજી તરફ, કેરળ વિધાનસભા ચૂંટણીને લઈને શશી થરૂરે સ્પષ્ટતા કરી છે કે તેઓ મુખ્યમંત્રી પદની રેસમાં નથી અને આ વખતે વિધાનસભા ચૂંટણી લડી રહ્યા નથી. જોકે, તેઓ કોંગ્રેસ (UDF) ને બહુમતી અપાવવા માટે રાજ્યના ખૂણેખૂણે પ્રચાર કરવા આતુર છે.