રાજકોટ: સોશિયલ મીડિયા પર હાલમાં એક મહારાષ્ટ્રીયન યુવતીનો વીડિયો ભારે ધૂમ મચાવી રહ્યો છે, જેણે ગુજરાતમાં પોતાના વ્યવસાય દરમિયાન અનુભવેલી ઉષ્મા અને પ્રેમની વાત શેર કરી છે. મહારાષ્ટ્રથી આવીને ગુજરાતમાં નાનો ફૂડ સ્ટોલ શરૂ કરનાર આ યુવતીએ કબૂલાત કરી છે કે તેણે શરૂઆતમાં ગુજરાતીઓને ઓછો આંકવાની ભૂલ કરી હતી, પરંતુ અહીંના લોકોના આદર અને સહયોગે તેનું દિલ જીતી લીધું છે.
સ્પર્ધા નહીં, પણ સહયોગની ભાવના
Indicore.com દ્વારા શેર કરવામાં આવેલી આ વીડિયો ક્લિપમાં મહિલા જણાવી રહી છે કે તેના સ્ટોલની સામે જ એક મોટી બરિસ્તા આઉટલેટ આવેલી છે. સામાન્ય રીતે વ્યવસાયમાં સ્પર્ધા જોવા મળતી હોય છે, પરંતુ અહીં બરિસ્તાના કર્મચારીઓ તેની પાસે જમવા આવતા અને તેની પાણીની બોટલો પણ ભરી આપતા. એટલું જ નહીં, 'દક્ષિણ ભોજનમ' નામના રેસ્ટોરન્ટના માલિકે પણ તેને આશ્વાસન આપ્યું હતું કે જો ક્યારેય શાકભાજી કે અન્ય કોઈ વસ્તુ ખૂટી પડે, તો તે સંકોચ વગર તેમના રસોડાનો ઉપયોગ કરી શકે છે. મહિલાએ ગળગળા થઈને કહ્યું, "ગુજરાતીઓ આટલા સહાયક હોય છે તેની મને કલ્પના નહોતી."
ભાષાવાદના વિવાદ વચ્ચે પ્રેમનો સેતુ
આ વીડિયો વાયરલ થતા જ સોશિયલ મીડિયા પર ચર્ચાઓનું પૂર આવ્યું છે. ઘણા યુઝર્સે આ ઉષ્માની તુલના અન્ય રાજ્યોમાં જોવા મળતા ભાષાકીય તણાવ સાથે કરી છે. એક યુઝરે ટિપ્પણી કરી કે, "શું અહીં કોઈએ તમને ગુજરાતી બોલવા માટે દબાણ કર્યું? ના. ઉલટાનું તમારો વ્યવસાય નાનો હોવા છતાં મોટા વેપારીઓએ તમને ગ્રાહક ગણીને મદદ કરી." અન્ય એક યુપીના યુઝરે પણ પોતાનો ૬ વર્ષનો અનુભવ શેર કરતા ગુજરાતને રહેવા માટેનું શ્રેષ્ઠ રાજ્ય ગણાવ્યું હતું.
ગુજરાતીઓ એટલે 'સૌથી મીઠા લોકો'
નેટીઝન્સ આ વીડિયો પર પ્રતિક્રિયા આપતા લખી રહ્યા છે કે ગુજરાતીઓનું દિલ ખૂબ મોટું હોય છે. જો તમે હિન્દી કે અન્ય ભાષા બોલો તો પણ તેઓ તમને સન્માન આપે છે. આ વીડિયોએ સાબિત કરી દીધું છે કે વેપાર માત્ર નફા માટે નહીં, પણ સંબંધો બાંધવા માટે પણ હોય છે. મહિલાએ વીડિયોના અંતે સ્વીકાર્યું કે આદર અને પ્રેમ જે ગુજરાતમાં મળ્યો છે તે અવિસ્મરણીય છે.