મેંગલુરુ: મધ્ય પૂર્વમાં ભભૂકી રહેલી યુદ્ધની જ્વાળાઓ વચ્ચે ભારત માટે રાહતના સમાચાર આવ્યા છે. રશિયન તેલ ટેન્કર 'એક્વા ટાઇટન' અંદાજે 7.70 લાખ બેરલ (1 લાખ ટનથી વધુ) ક્રૂડ ઓઇલ લઈને કર્ણાટકના મેંગલુરુ કિનારે પહોંચી ગયું છે. આશ્ચર્યજનક વાત એ છે કે, શિપ ટ્રેકિંગ ડેટા મુજબ આ જહાજ અગાઉ ચીનના રિઝાઓ બંદર તરફ જઈ રહ્યું હતું, પરંતુ દક્ષિણ-પૂર્વ એશિયાઈ સમુદ્રમાં અચાનક તેનો માર્ગ બદલીને તેને ભારત તરફ વાળવામાં આવ્યું હતું. ગઈકાલે રાત્રે આ વિશાળકાય જહાજ દરિયા કિનારેથી 18 નોટિકલ માઇલ દૂર સ્થિર થયું હતું, જ્યાંથી હવે પાઇપલાઇન દ્વારા આ કાચું તેલ મેંગલુરુ રિફાઇનરી એન્ડ પેટ્રોકેમિકલ્સ લિમિટેડ (MRPL) ની સુવિધા સુધી પહોંચાડવામાં આવશે.

વૈશ્વિક તેલ બજારમાં અત્યારે ભારે અફરાતફરીનો માહોલ છે. ઈરાન અને ઈઝરાયેલ વચ્ચેના સંઘર્ષને કારણે વ્યૂહાત્મક રીતે મહત્વપૂર્ણ ગણાતી 'હોર્મુઝ સ્ટ્રેટ' પાસે વિશ્વના લગભગ 700 જેટલા જહાજો ફસાયેલા છે. આ અવરોધને કારણે આંતરરાષ્ટ્રીય તેલ બજારમાં સપ્લાય થતા કુલ ક્રૂડના 20% હિસ્સો અટકી પડ્યો છે, જેને પગલે ક્રૂડ ઓઇલના ભાવ પ્રતિ બેરલ $100 ની સપાટી વટાવી ગયા છે. આવી કટોકટીની સ્થિતિમાં રશિયા પાસેથી મળેલું આ તેલ ભારતની ઊર્જા સુરક્ષા માટે સંજીવની સમાન સાબિત થશે. કેન્દ્ર સરકાર રશિયા સાથેના વેપારને મજબૂત બનાવીને સ્થાનિક બજારમાં ઈંધણની અછત ન સર્જાય તે માટે સતત પ્રયત્નશીલ છે.

બીજી તરફ, ભારત માત્ર તેલ જ નહીં પણ LPG (રસોઈ ગેસ) ના પુરવઠા માટે પણ વૈકલ્પિક માર્ગો શોધી રહ્યું છે. અમેરિકાના ટેક્સાસથી LPG ભરીને નીકળેલું કાર્ગો જહાજ 'પિક્સિસ પાયોનિયર' પણ ન્યૂ મેંગલુરુ બંદર પર સફળતાપૂર્વક પહોંચ્યું છે. મધ્ય પૂર્વમાંથી ગેસ સપ્લાય ખોરવાતા ભારતે અમેરિકા અને અન્ય પશ્ચિમી દેશો પાસેથી આયાત વધારી દીધી છે. નોંધનીય છે કે, અમેરિકાએ પણ ભારતને રશિયન તેલની આયાતમાં કામચલાઉ વધારો કરવાની મંજૂરી આપી છે, જે ભારતની મજબૂત વિદેશ નીતિ અને વધતી આર્થિક શક્તિનો પુરાવો છે. છેલ્લા 21 દિવસમાં જ ચાર ભારતીય ધ્વજ ધરાવતા તેલ અને ગેસના જહાજો સુરક્ષિત રીતે ભારત પહોંચ્યા છે.

આ આખી પ્રક્રિયા ભારતની એનર્જી સપ્લાય ચેઈનને સુરક્ષિત રાખવા માટેના માસ્ટરપ્લાનનો ભાગ છે. વિદેશ સચિવ રાજેશ સિંહાએ પુષ્ટિ કરી છે કે ભારત સરકાર દરેક પરિસ્થિતિ પર ઝીણવટભરી નજર રાખી રહી છે જેથી સામાન્ય જનતા પર યુદ્ધની આર્થિક અસર ન પડે. જ્યારે વિશ્વના અન્ય દેશો મોંઘવારી અને તેલની અછત સામે ઝઝૂમી રહ્યા છે, ત્યારે રશિયા અને અમેરિકા જેવા દેશો સાથેના વ્યૂહાત્મક સંબંધોને કારણે ભારત પોતાના રિઝર્વ સ્ટોકને મજબૂત કરી રહ્યું છે. આગામી દિવસોમાં જો યુદ્ધ વધુ વકરશે તો પણ ભારત પાસે પૂરતો તેલ અને ગેસનો જથ્થો ઉપલબ્ધ રહે તે માટે સરકારે આગોતરી તૈયારીઓ કરી લીધી છે.