મુંબઈ: આર્થિક રાજધાની મુંબઈના રાજકારણમાં એક તસવીરે નવો વિવાદ છેડ્યો છે. મુંબઈ મ્યુનિસિપલ કોર્પોરેશનની ચૂંટણીમાં પ્રથમ વખત વોર્ડ કમિટીના અધ્યક્ષ પદ પર ઐતિહાસિક જીત મેળવનાર AIMIM કાઉન્સિલર ખૈરુન્નિસા અખ્તર હુસૈન અત્યારે વિપક્ષના નિશાન પર છે. વિવાદનું મુખ્ય કારણ તેમની ઓફિસની દિવાલ પર લાગેલો એક ફોટો છે, જેમાં પાર્ટી પ્રમુખ અસદુદ્દીન ઓવૈસીની સાથે તેમના પતિ અકબર હુસૈન જોવા મળી રહ્યા છે. સરકારી કચેરીમાં ગુનાહિત ઇતિહાસ ધરાવતી વ્યક્તિનો ફોટો લગાવતા જ ભાજપે આક્રમક વલણ અખત્યાર કર્યું હતું અને શાસન વ્યવસ્થા પર ગંભીર સવાલો ઉઠાવ્યા હતા.

ભાજપના નેતાઓએ આ મામલે આકરો વિરોધ નોંધાવતા જણાવ્યું કે અકબર હુસૈન કોઈ સામાન્ય વ્યક્તિ નથી, પરંતુ પોલીસ રેકોર્ડમાં તે એક કુખ્યાત હિસ્ટ્રીશીટર છે. જે વ્યક્તિને તેના ગુનાહિત રેકોર્ડને કારણે કાયદેસર રીતે શહેરમાં પ્રવેશવા પર પ્રતિબંધ (તડીપાર) મૂકવામાં આવ્યો હોય, તેની તસવીર જાહેર વહીવટી ઓફિસમાં કેવી રીતે હોઈ શકે? આ દબાણ વધતા અને મામલો વધુ બિચકતા જોઈ AIMIM ના વરિષ્ઠ નેતૃત્વએ તાત્કાલિક હસ્તક્ષેપ કરવો પડ્યો હતો. પક્ષની આબરૂ બચાવવા માટે અંતે ખૈરુન્નિસા હુસૈનને તેમની ઓફિસમાંથી તે વિવાદાસ્પદ ફોટો હટાવી લેવાની ફરજ પડી હતી.

અકબર હુસૈન ઉર્ફે 'રાજુ બાટલા'નો ગુનાહિત ઇતિહાસ અત્યંત ભયાનક છે. પોલીસ દફતરે તેની સામે હત્યા, હત્યાનો પ્રયાસ, ખંડણીખોરી અને દાણચોરી જેવા ૨૩ થી વધુ ગંભીર ગુનાઓ નોંધાયેલા છે. આ વિવાદમાં આમ આદમી પાર્ટીના રાષ્ટ્રીય પ્રવક્તા પ્રીતિ શર્મા-મેનને પણ ઝંપલાવ્યું છે. તેમણે ગંભીર આરોપ લગાવતા યાદ અપાવ્યું કે અકબર હુસૈન એ જ વ્યક્તિ છે જેનું નામ ભાજપના દિગ્ગજ નેતા લાલકૃષ્ણ અડવાણીની હત્યાના કાવતરામાં ઉછળ્યું હતું અને તે સમયે તેની ધરપકડ પણ કરવામાં આવી હતી. આવા રેકોર્ડ ધરાવતી વ્યક્તિનો પ્રભાવ સરકારી ઓફિસમાં દેખાવો તે લોકશાહી માટે ચિંતાનો વિષય છે.

જોકે ફોટો હટાવી લેવામાં આવ્યો છે, પરંતુ ગોવંડી અને દેવનાર જેવા વિસ્તારોમાં આ મુદ્દે રાજકીય ચર્ચા હજુ પણ તેજ છે. AIMIM ના આઠ કાઉન્સિલરોની જીત બાદ પક્ષ મુંબઈમાં પોતાનું વર્ચસ્વ વધારવા મથામણ કરી રહ્યો છે, ત્યારે આ પ્રકારની ઘટનાઓએ પક્ષની છબીને નુકસાન પહોંચાડ્યું છે. વિપક્ષો હવે આ મુદ્દાને મુંબઈ મહાનગરપાલિકાની આગામી કાર્યવાહીઓમાં પણ ઉઠાવવાની તૈયારી કરી રહ્યા છે. અત્યારે તો મુંબઈના રાજકીય ગલિયારાઓમાં એક જ સવાલ ગુંજી રહ્યો છે કે શું ચૂંટાયેલા પ્રતિનિધિઓ પોતાની સત્તાનો ઉપયોગ ગુનાહિત તત્વોને મહિમામંડિત કરવા માટે કરી રહ્યા છે?