ચંદીગઢ: પંજાબ રાજ્ય વેરહાઉસ કોર્પોરેશનના જિલ્લા મેનેજર (DM) ડૉ. ગગનદીપ સિંહ રંધાવાના શંકાસ્પદ મૃત્યુના મામલે આજે ચંદીગઢમાં રાજકીય ગરમાવો ચરમસીમાએ પહોંચ્યો હતો. પંજાબની આમ આદમી પાર્ટી સરકાર વિરુદ્ધ વિપક્ષી પક્ષોએ એકસૂરે મોરચો માંડતા ચંદીગઢની સડકો રણમેદાનમાં ફેરવાઈ ગઈ હતી. કોંગ્રેસ, શિરોમણી અકાલી દળ અને ભાજપના હજારો કાર્યકરો તેમજ નેતાઓ મુખ્યમંત્રી ભગવંત માનના નિવાસસ્થાનનો ઘેરાવો કરવા માટે કૂચ કરી રહ્યા હતા. આ દરમિયાન સુરક્ષા વ્યવસ્થા જાળવવા માટે તૈનાત કરાયેલા પોલીસ કાફલાએ તેમને રોકવા માટે ભારે જહેમત ઉઠાવવી પડી હતી.

પરિસ્થિતિ ત્યારે વધુ વણસી જ્યારે ઉશ્કેરાયેલા પ્રદર્શનકારીઓએ પોલીસ દ્વારા લગાવવામાં આવેલા બેરિકેડ્સ તોડીને આગળ વધવાનો પ્રયાસ કર્યો હતો. પોલીસે ભીડને વિખેરવા માટે વોટર કેનન (પાણીના તોપ) નો ઉપયોગ કર્યો હતો, જેના કારણે વાતાવરણ અત્યંત તંગ બની ગયું હતું. વિપક્ષી નેતાઓનો આક્ષેપ છે કે ડીએમના મૃત્યુ પાછળ સત્તાધારી પક્ષના નેતાઓનો હાથ છે અને તેઓ આ મામલે મંત્રી લાલજીત સિંહ ભુલ્લરની તાત્કાલિક ધરપકડની માંગ કરી રહ્યા છે. હાઈવે અને મુખ્ય માર્ગો પર પ્રદર્શનકારીઓના ભારે સૂત્રોચ્ચારને કારણે કલાકો સુધી ટ્રાફિક જામના દ્રશ્યો સર્જાયા હતા.

પોલીસ અને દેખાવકારો વચ્ચે થયેલી આ ઝપાઝપી બાદ ચંદીગઢ પોલીસે સ્થિતિ પર કાબૂ મેળવવા માટે વિપક્ષના દિગ્ગજ નેતાઓની સામૂહિક અટકાયત કરી હતી. પ્રાપ્ત વિગતો અનુસાર, ભાજપના સુનીલ જાખડ, અકાલી દળના બિક્રમ મજીઠિયા અને કોંગ્રેસના પ્રતાપ સિંહ બાજવા સહિતના ટોચના નેતાઓને કસ્ટડીમાં લેવામાં આવ્યા છે. આ નેતાઓને સેક્ટર ૩ પોલીસ સ્ટેશન ખાતે લઈ જવામાં આવ્યા હતા, જ્યાં પણ કાર્યકરોએ સરકાર વિરોધી નારા લગાવવાનું ચાલુ રાખ્યું હતું. વિપક્ષોએ આ ઘટનાને લોકશાહીની હત્યા ગણાવીને સરકાર પર ભીનું સંકેલવાનો આરોપ મૂક્યો છે.

આ હિંસક વિરોધ પ્રદર્શનોને પગલે ચંદીગઢના વીવીઆઈપી વિસ્તારોમાં ચુસ્ત પોલીસ બંદોબસ્ત ગોઠવી દેવામાં આવ્યો છે. રાજ્ય વેરહાઉસ કોર્પોરેશનના અધિકારીના મોતની તપાસ નિષ્પક્ષ રીતે કરવાની માંગ સાથે હવે આ મામલો રાજ્યપાલ સુધી પહોંચાડવાની વિપક્ષોએ તૈયારી કરી છે. બીજી તરફ, આપ સરકારે આ પ્રદર્શનને રાજકીય સ્ટંટ ગણાવ્યો છે. આગામી દિવસોમાં આ વિવાદ વધુ વકરે તેવી પૂરેપૂરી શક્યતા છે, કારણ કે તમામ વિરોધ પક્ષોએ જ્યાં સુધી ન્યાય નહીં મળે ત્યાં સુધી આંદોલન ચાલુ રાખવાની ચીમકી ઉચ્ચારી છે.