નવી દિલ્હી: નવા નાણાકીય વર્ષ ૨૦૨૬-૨૭ ની શરૂઆત સાથે જ નોકરિયાત વર્ગના ટેક્સ પ્લાનિંગમાં મોટા ફેરફારો થવા જઈ રહ્યા છે. સરકારે ભલે ટેક્સ સ્લેબ યથાવત રાખ્યા હોય, પરંતુ 'આવકવેરા નિયમો ૨૦૨૬' હેઠળ ભથ્થાંની ગણતરી બદલી નાખી છે. સૌથી સારા સમાચાર પર્યાવરણ પ્રેમીઓ માટે છે; જો તમે ઓફિસ જવા માટે ઇલેક્ટ્રિક વ્હીકલ (EV) નો ઉપયોગ કરો છો, તો હવે તમને દર મહિને ₹૫,૦૦૦ સુધીના ઇંધણ અને જાળવણી ભથ્થા પર કર મુક્તિ મળશે. અગાઉ ગાડીના એન્જિનની ક્ષમતા (CC) ના આધારે ટેક્સ લાગતો હતો, જેમાં EV વપરાશકર્તાઓ મૂંઝવણમાં હતા, પરંતુ હવે સરકારે આ માર્ગ મોકળો કરીને ગ્રીન એનર્જીને પ્રોત્સાહન આપ્યું છે.

બીજી તરફ, ઘર ભાડા ભથ્થા (HRA) ના નિયમોમાં થયેલા સુધારાએ મિશ્ર પ્રતિસાદ આપ્યો છે. હવે અમદાવાદ, બેંગલુરુ, હૈદરાબાદ અને પુણે જેવા ઝડપથી વિકસતા શહેરોમાં રહેતા કર્મચારીઓ મેટ્રો સિટીની જેમ ૫૦% HRA મુક્તિનો લાભ લઈ શકશે. આ નિર્ણયથી આ શહેરોમાં રહેતા હજારો આઈટી અને કોર્પોરેટ પ્રોફેશનલ્સની ટેક્સ બચત વધશે. જોકે, દિલ્હી-NCR ના સેટેલાઇટ શહેરો જેવા કે નોઈડા અને ગુરુગ્રામ માં રહેતા લોકો માટે હજુ પણ ૪૦% ની મર્યાદા જ જાળવી રાખવામાં આવી છે. આ વિસ્તારોમાં ભાડા આસમાને હોવા છતાં ટેક્સ મુક્તિ ઓછી મળવી એ પગારદાર વર્ગ માટે માસિક બજેટ ખોરવી નાખનારા સમાચાર સાબિત થઈ શકે છે.

સરકાર હવે માત્ર રોકડ કે બેંક ટ્રાન્ઝેક્શન જ નહીં, પણ તમારી ડિજિટલ મિલકતો પર પણ બાજ નજર રાખશે. જો તમે ક્રિપ્ટોકરન્સી કે ડિજિટલ કરન્સી માં રોકાણ કરો છો, તો હવે તેની વિગતો છુપાવવી અશક્ય બનશે. OECD ના આંતરરાષ્ટ્રીય ધોરણો મુજબ, ડિજિટલ એસેટ્સનું રિપોર્ટિંગ હવે ફરજિયાત અને અત્યંત પારદર્શક બનાવવામાં આવ્યું છે. આ ઉપરાંત, ચેરિટેબલ ટ્રસ્ટો માટે રજીસ્ટ્રેશનની પ્રક્રિયા સરળ કરીને કાગળકામ ઘટાડવામાં આવ્યું છે. ટૂંકમાં, ૧ એપ્રિલથી અમલી બનનારા આ નિયમો પગારદાર લોકોના 'ટેક હોમ સેલરી' (હાથમાં આવતા પગાર) માં મોટો ઉલટફેર કરી શકે છે, તેથી અત્યારથી જ તમારા નાણાકીય આયોજન પર નજર ફેરવી લેવી હિતાવહ છે.