નવી દિલ્હી | તા.૨૩: પશ્ચિમ એશિયા (મિડલ ઈસ્ટ) માં વધી રહેલા ભૌગોલિક અને રાજકીય તણાવને કારણે હવાઈ ક્ષેત્ર પર લાદવામાં આવેલા પ્રતિબંધોએ આંતરરાષ્ટ્રીય વિમાન વ્યવહારને ખોરવી નાખ્યો છે. આ કટોકટીના સમયમાં ભારત અને ખાડી દેશો વચ્ચે ફસાયેલા હજારો મુસાફરો માટે રાહતના સમાચાર આવ્યા છે. કતાર એરવેઝે જાહેરાત કરી છે કે તે પશ્ચિમ એશિયાના પ્રતિબંધિત એરસ્પેસને કારણે સર્જાયેલી અરાજકતા વચ્ચે ભારત માટે 10 વિશેષ બિન-સુનિશ્ચિત (Non-Scheduled) ફ્લાઇટ્સ ચલાવશે.
વિદેશ મંત્રાલય (MEA) ના અધિક સચિવ અસીમ આર. મહાજને આ અંગે માહિતી આપતા જણાવ્યું હતું કે, "પશ્ચિમ એશિયામાં સર્જાયેલી સ્થિતિને પગલે ફ્લાઇટ ઓપરેશનમાં વિક્ષેપ પડ્યો હતો, પરંતુ હવે સ્થિતિ ધીમે ધીમે સુધરી રહી છે. મુસાફરોની સુવિધા અને વધતી માંગને પહોંચી વળવા માટે કતાર એરવેઝ આજે ભારત માટે 10 ખાસ ફ્લાઇટ્સનું સંચાલન કરશે." આ પગલાથી ખાસ કરીને એવા ભારતીયોને ફાયદો થશે જેઓ કનેક્ટિંગ ફ્લાઇટ્સ રદ થવાને કારણે એરપોર્ટ્સ પર અટવાયા હતા.
એરલાઇન દ્વારા જારી કરાયેલ સત્તાવાર યાદી મુજબ, આગામી 28 માર્ચ, 2026 સુધી માત્ર મર્યાદિત સંખ્યામાં જ વિમાનો ઉડાન ભરી શકશે. સુરક્ષાના કારણોસર રૂટમાં ફેરફાર અને પ્રતિબંધોને જોતા એરલાઇને મુસાફરોને સલાહ આપી છે કે તેઓ કોઈપણ ત્રીજા પક્ષના એજન્ટો પર વિશ્વાસ કરવાને બદલે એરલાઇનની સત્તાવાર વેબસાઇટ અથવા મોબાઇલ એપ દ્વારા જ બુકિંગની ખરાઈ કરે.
નોંધનીય છે કે માત્ર કતાર એરવેઝ જ નહીં, પરંતુ સિંગાપોર એરલાઇન્સ અને એતિહાદ જેવી મોટી કંપનીઓએ પણ મધ્ય પૂર્વની કટોકટીને ધ્યાનમાં રાખીને પોતાની ઘણી ફ્લાઇટ્સ રદ કરી છે અથવા તેમના શિડ્યુલમાં ફેરફાર કર્યો છે. આ સંજોગોમાં કતાર એરવેઝ દ્વારા લેવાયેલો 10 ખાસ ફ્લાઇટ્સનો નિર્ણય ભારત-ગલ્ફ કોરિડોર માટે અત્યંત મહત્વપૂર્ણ માનવામાં આવી રહ્યો છે. મુસાફરોને વિનંતી કરવામાં આવી છે કે તેઓ એરપોર્ટ પર પ્રસ્થાન કરતા પહેલા ફ્લાઇટનું સ્ટેટસ ચોક્કસપણે ચેક કરી લે.