નવી દિલ્હી | તા.૨૩: પશ્ચિમ એશિયા (મિડલ ઈસ્ટ) માં સતત વણસી રહેલી પરિસ્થિતિ અને હવાઈ ક્ષેત્ર પરના પ્રતિબંધો વચ્ચે ભારતની સૌથી મોટી ખાનગી એરલાઇન ઈન્ડિગોએ પ્રવાસીઓ માટે મહત્વની એડવાઈઝરી જારી કરી છે. એરલાઇને જણાવ્યું છે કે તે ૨૨ માર્ચ, ૨૦૨૬ ના રોજ ગલ્ફ દેશો માટે કેટલીક પસંદગીની (Selective) ફ્લાઇટ્સનું સંચાલન કરશે. જોકે, આ વિસ્તારમાં પ્રવર્તતા ભારે તણાવને કારણે ફ્લાઇટના સમયપત્રકમાં કોઈપણ ક્ષણે ફેરફાર થઈ શકે છે અથવા ફ્લાઇટ રદ પણ થઈ શકે છે.
ઈન્ડિગોએ સોશિયલ મીડિયા પ્લેટફોર્મ 'X' પર એક પોસ્ટ દ્વારા મુસાફરોને સાવચેત કર્યા છે કે, મધ્ય પૂર્વમાં બદલાતી જતી ભૌગોલિક-રાજકીય સ્થિતિને કારણે એરપોર્ટ પર રવાના થતા પહેલા મુસાફરોએ તેમની ફ્લાઇટનું લેટેસ્ટ સ્ટેટસ અચૂક ચેક કરી લેવું. એરલાઇને સ્પષ્ટ કર્યું છે કે હાલમાં તમામ કામગીરી આંતરરાષ્ટ્રીય સુરક્ષા માપદંડો અને નિયમનકારી મંજૂરીઓને આધીન કરવામાં આવી રહી છે.
મુસાફરોની સહાય માટે સ્પેશિયલ ડેસ્ક
એરલાઇન દ્વારા જણાવવામાં આવ્યું છે કે, "અમારી ટીમો ગ્રાહકોને ટેકો આપવા અને તેમને તેમના પ્રિયજનો સાથે ફરીથી જોડવા માટે ચોવીસ કલાક કામ કરી રહી છે." જે મુસાફરોને બુકિંગ, ટિકિટ રદ કરવા અથવા રિશેડ્યુલિંગ સંબંધિત સમસ્યાઓ આવી રહી હોય, તેમની મદદ માટે એક સમર્પિત 'કોન્ટેક્ટ સેન્ટર ડેસ્ક' પણ શરૂ કરવામાં આવ્યું છે. ઈન્ડિગોએ ભારપૂર્વક કહ્યું છે કે મુસાફરો અને ક્રૂ મેમ્બર્સની સુરક્ષા તેમની સર્વોચ્ચ પ્રાથમિકતા છે અને સુરક્ષા સાથે કોઈ પણ પ્રકારનું જોખમ લેવામાં આવશે નહીં.
છેલ્લી ઘડીના ફેરફારની શક્યતા
યુદ્ધ જેવી સ્થિતિમાં હવાઈ માર્ગો વારંવાર બદલવા પડતા હોય છે, જેના કારણે ફ્લાઇટના સમયમાં વિલંબ અથવા ફેરફાર થવો સામાન્ય છે. ઈન્ડિગોએ જણાવ્યું હતું કે ટૂંકી સૂચના પર પણ શેડ્યૂલ બદલાઈ શકે છે, તેથી મુસાફરોએ એરલાઇન તરફથી આવતા મેસેજ અને ઇમેઇલ્સ પર ખાસ નજર રાખવી જોઈએ. ભારત અને ગલ્ફ દેશો વચ્ચે મુસાફરી કરતા લાખો ભારતીયો માટે ઈન્ડિગોની આ કનેક્ટિવિટી અત્યંત મહત્વપૂર્ણ માનવામાં આવે છે.