નવી દિલ્હી : આંતરરાષ્ટ્રીય સ્તરે સાયબર છેતરપિંડી આચરી કરોડો રૂપિયા પડાવનારા આરોપી કોમલ કુમાર ઉર્ફે 'જીમી'ને દિલ્હીની રાઉસ એવન્યુ કોર્ટે મોટો ઝટકો આપ્યો છે. પોતાની પત્નીની ગંભીર બીમારી અને સર્જરીનું કારણ આગળ ધરીને છ અઠવાડિયાના વચગાળાના જામીન મેળવવાની જીમીની રણનીતિ આ વખતે કામ ન આવી. ખાસ CBI કોર્ટે આરોપીની અરજી ફગાવી દેતા સ્પષ્ટ કર્યું કે, એક જ તબીબી કારણનો ઉપયોગ કરીને વારંવાર જામીન માંગવા એ ન્યાયિક પ્રક્રિયાને ગેરમાર્ગે દોરવાનો પ્રયાસ છે.
સીબીઆઈના જણાવ્યા મુજબ, કોમલ કુમાર 'ટેકુ સમુરાઇ' નામના હાઈટેક કોલ સેન્ટર દ્વારા જાપાની નાગરિકોને નિશાન બનાવતો હતો. આ ગેંગ નિર્દોષ લોકોના કોમ્પ્યુટરમાં નકલી વાયરસ ચેતવણીઓ અને પોપ-અપ્સ મોકલી તેમને ડરાવતી હતી અને 'સિક્યોરિટી સોફ્ટવેર' ના નામે કરોડો રૂપિયા પડાવતી હતી. તપાસમાં બહાર આવ્યું છે કે જીમીએ આ આંતરરાષ્ટ્રીય રેકેટ દ્વારા આશરે ૧૪.૭ કરોડ રૂપિયાની છેતરપિંડી આચરી હતી.
કોર્ટની કડક ટિપ્પણી અને શંકાસ્પદ મેડિકલ રિપોર્ટ્સ
આરોપીએ દલીલ કરી હતી કે તેની પત્નીને 'ડિસ્ક પ્રોલેપ્સ' છે અને ૨૦ માર્ચ, ૨૦૨૬ના રોજ તેની સર્જરી થવાની હતી, તેથી તેને ઘર અને બે વર્ષના બાળકની સંભાળ રાખવા માટે જામીન જોઈએ છે. જોકે, કોર્ટે નોંધ્યું કે જાન્યુઆરી ૨૦૨૬માં પણ તેને આ જ કારણસર બે વાર જામીન અપાયા હતા, છતાં તેણે સર્જરી કરાવી નહોતી. વધુમાં, તેની પત્નીની સારવાર માટે વારંવાર હોસ્પિટલો બદલવામાં આવી હતી (મેક્સથી PSR અને પછી IBS), જેનું કોઈ ઠોસ કારણ ન હોવાથી કોર્ટે શંકા વ્યક્ત કરી હતી.
સીબીઆઈની દલીલ: નેપાળ ભાગી ગયો હતો આરોપી
સીબીઆઈએ જામીનનો સખત વિરોધ કરતા જણાવ્યું હતું કે, કોમલ કુમાર અત્યંત ચતુર આરોપી છે. તે અગાઉ ધરપકડથી બચવા નેપાળ છુપાયો હતો અને યુએઈ (UAE) ભાગી જવાની ફિરાકમાં હતો ત્યારે જ પકડાયો હતો. તેણે પુરાવાનો નાશ કરવા માટે પોતાના મોબાઈલ ફોન અને સિમ કાર્ડ પણ તોડી નાખ્યા હતા. એજન્સીએ ડર વ્યક્ત કર્યો હતો કે જો તેને બહાર આવવા દેવામાં આવે, તો તે ડિજિટલ પુરાવા સાથે છેડછાડ કરી શકે છે અને હજુ પણ ફરાર એવા સહ-આરોપીઓને મદદ કરી શકે છે.
કોર્ટના આ કડક વલણને કારણે સાયબર ગુનેગારોમાં ફફડાટ વ્યાપી ગયો છે. હવે જીમીએ જેલમાં રહીને જ કાયદાકીય લડત લડવી પડશે.