વારાણસી: કાશીની પવિત્ર ધરતી પરથી શંકરાચાર્ય સ્વામી અવિમુક્તેશ્વરાનંદ સરસ્વતીએ હિન્દુ ધર્મ, શાસ્ત્રો અને ગૌમાતાના રક્ષણ માટે એક વિશાળ 'ચતુરંગિની સેના'ની રચના કરવાની જાહેરાત કરી છે. આ સેનામાં કુલ ૨,૧૮,૭૦૦ સૈનિકોની ભરતી કરવામાં આવશે, જેઓ પીળા રંગના ગણવેશમાં સજ્જ હશે અને તેમના હાથમાં શસ્ત્ર તરીકે 'પરશુ' (કુહાડી) ધારણ કરશે. શંકરાચાર્ય પોતે આ સેનાના પ્રમુખ રહેશે અને તેના સંચાલન માટે ૨૭ સભ્યોની વિશેષ સભાની રચના કરવામાં આવી છે.
શંકરાચાર્યે આ સેનાની કાર્યપદ્ધતિ સમજાવતા ત્રણ મુખ્ય તબક્કાઓ ગણાવ્યા: "ટોકો, રોકો અને થોકો". તેમણે સ્પષ્ટ કર્યું કે, પહેલા જો કોઈ ખોટું કામ થતું હોય તો તેને ટોકવામાં આવશે. જો તે ન માને તો તેને રોકવામાં આવશે અને છેલ્લે 'થોકવાનો' અર્થ સીધો શારીરિક હુમલો નથી, પરંતુ કાયદાકીય દાવો, ફરિયાદ કે પંચાયત દ્વારા બંધારણીય રીતે પગલાં લેવાનો છે.
 
કેવી રીતે તૈયાર થશે ૨.૧૮ લાખ સૈનિકોની સેના?
સેનાના માળખા વિશે માહિતી આપતા શંકરાચાર્યે જણાવ્યું કે:
•    ટીમ વર્ક: ૧૦ લોકોની એક નાની ટીમ (પાન) બનાવવામાં આવશે.
•    જિલ્લાવાર આયોજન: ભારતના આશરે ૮૦૦ જિલ્લાઓમાંથી દરેક જિલ્લામાં ૨૭ ટીમો એટલે કે ૨૭૦ લોકોની ભરતી કરવામાં આવશે.
•    કુલ સંખ્યા: આ રીતે ગણતરી કરતા સમગ્ર દેશમાં ૨,૧૬,૦૦૦ થી વધુ સજ્જ સૈનિકોની ફોજ તૈયાર થશે.
 
મંદિરોમાં પ્રવેશ અંગે કડક વલણ
ઉત્તરાખંડના બદ્રીનાથ અને કેદારનાથ મંદિરોમાં બિન-હિન્દુઓના પ્રવેશના વિવાદ પર શંકરાચાર્યે મક્કા-મદીનાનું ઉદાહરણ આપ્યું હતું. તેમણે કહ્યું કે જો ત્યાં અન્ય ધર્મના લોકો પર પ્રતિબંધ હોય તો આપણા ધાર્મિક સ્થળોની પવિત્રતા જાળવવા માટે પણ આવી વ્યવસ્થા હોવી જોઈએ. જે લોકો સનાતન ધર્મમાં શ્રદ્ધા ધરાવે છે, તેમણે જ મંદિરોમાં પ્રવેશ કરવો જોઈએ.
શા માટે પડી સેનાની જરૂર?
ઐતિહાસિક રીતે આદિ શંકરાચાર્યે ૮મી સદીમાં ધર્મરક્ષા માટે અખાડાઓની સ્થાપના કરી હતી. જોકે, તાજેતરના સમયમાં અખાડા પરિષદ સાથેના વિવાદો અને ગૌ-સંરક્ષણ અભિયાનમાં સંતોની મર્યાદિત ભાગીદારીને જોતા, શંકરાચાર્ય અવિમુક્તેશ્વરાનંદે પોતાની અલગ સેના બનાવવાનો નિર્ણય લીધો હોય તેમ જણાય છે. આ જાહેરાત બાદ અખિલેશ યાદવ સહિતના રાજકીય નેતાઓએ પણ શંકરાચાર્ય સાથે મુલાકાત કરી હતી, જેણે ઉત્તર પ્રદેશના રાજકારણમાં ગરમાવો લાવી દીધો છે.