રાજકોટ: પશ્ચિમ એશિયામાં ચાલી રહેલું યુદ્ધ હવે વધુ જટિલ અને વિસ્ફોટક બની રહ્યું છે. ઈઝરાયલી વડાપ્રધાન બેન્જામિન નેતન્યાહુ તેમની વિશ્વવિખ્યાત ગુપ્તચર એજન્સી 'મોસાદ' (Mossad) ના વડા ડેવિડ બાર્નેઆ પર ભારે ગુસ્સે ભરાયા હોવાના અહેવાલ છે. યુદ્ધ શરૂ થયાના ત્રણ અઠવાડિયા પછી પણ ઈરાનમાં કોઈ મોટો બળવો ન થતા નેતન્યાહુની રણનીતિ ઊંધી પડી છે. મોસાદે દાવો કર્યો હતો કે જો ઈરાન પર હુમલો થશે તો ત્યાંની જનતા ઈસ્લામિક શાસન વિરુદ્ધ રસ્તા પર ઉતરી આવશે, પરંતુ હકીકતમાં ઈરાન વધુ મજબૂત બનીને વળતો પ્રહાર કરી રહ્યું છે.
અહેવાલો અનુસાર, મોસાદના આ જ રિપોર્ટના આધારે નેતન્યાહુએ અમેરિકી પ્રમુખ ડોનાલ્ડ ટ્રમ્પને ઈરાન પર હુમલો કરવા માટે સહમત કર્યા હતા. ૨૮ ફેબ્રુઆરીએ થયેલા હુમલા બાદ ટ્રમ્પ અને નેતન્યાહુ બંનેએ ઈરાની જનતાને બળવો કરવા હાકલ કરી હતી, પરંતુ જનતાએ શાસન ઉથલાવવાને બદલે દેશ સાથે ઉભા રહેવાનું પસંદ કર્યું છે. હવે નેતન્યાહુને ડર છે કે જો પરિણામ નહીં મળે તો ટ્રમ્પ ગમે ત્યારે સૈન્ય સહયોગ રોકી શકે છે.
 
શેરબજારમાં રક્તપાત: રોકાણકારોમાં ગભરાટ
યુદ્ધના આ તણાવની સીધી અને વિનાશક અસર ભારતીય શેરબજાર પર જોવા મળી છે. સોમવારે બજાર ખુલતાની સાથે જ વેચવાલીનું ભારે દબાણ જોવા મળ્યું હતું.
•    સેન્સેક્સનો કડાકો: સેન્સેક્સ ૧૮૩૬.૫૭ પોઈન્ટ (૨.૪૬%) ઘટીને ૭૨,૬૯૬.૩૯ પર બંધ થયો.
•    નિફ્ટીમાં ગાબડું: નિફ્ટી ૬૦૧.૮૫ પોઈન્ટ (૨.૬૦%) તૂટીને ૨૨,૫૧૨.૬૫ ના સ્તરે પહોંચી ગયો.
•    ટોચની કંપનીઓ ધોવાઈ: HDFC બેંક, અદાણી પોર્ટ્સ અને ઈન્ડિગો જેવી દિગ્ગજ કંપનીઓના શેરમાં ૪ ટકાથી વધુનો ઘટાડો નોંધાયો હતો. સેન્સેક્સની ૩૦ માંથી ૨૭ બ્લુચિપ કંપનીઓ લાલ નિશાનમાં બંધ રહી હતી.
 
વ્યૂહાત્મક નિષ્ફળતાનો સ્વીકાર?
મોસાદના પૂર્વ વડા યોસી કોહેને અગાઉ ચેતવણી આપી હતી કે ઈરાનમાં શાસન પરિવર્તન કરવું અત્યંત મુશ્કેલ છે. હવે વર્તમાન વડા ડેવિડ બાર્નેઆની યોજના નિષ્ફળ જતા ઈઝરાયલ અને અમેરિકા અન્ય દેશોની મદદ શોધવા મજબૂર બન્યા છે. બીજી તરફ, કુર્દિશ લશ્કરની મદદથી સરકાર ઉથલાવવાની આશા પણ ઠગારી નીવડી છે.
યુદ્ધની આ અનિશ્ચિતતાને કારણે વૈશ્વિક બજારો ડામાડોળ છે. જો આગામી દિવસોમાં ઈરાન વળતો પ્રહાર તેજ કરશે, તો શેરબજારમાં હજુ વધુ કડાકો આવવાની સંભાવના નિષ્ણાતો વ્યક્ત કરી રહ્યા છે. રોકાણકારો અત્યારે "રાહ જુઓ અને જુઓ" (Wait and Watch) ની નીતિ અપનાવી રહ્યા છે.