સરાઈકેલા (ઝારખંડ) : ઝારખંડના સરાઈકેલા કલેક્ટર કચેરીમાં સોમવારે તે સમયે અફરાતફરી મચી ગઈ જ્યારે ભ્રષ્ટાચાર વિરોધી બ્યુરો (ACB) ની ટીમે પૂર્વ આયોજિત છટકું ગોઠવીને મોટી કાર્યવાહી હાથ ધરી. જમીન સુધારણા (DCLR) કચેરીમાં ફરજ બજાવતા કર્મચારી પ્રીતમ આચાર્ય અને એક વચેટિયાને ₹૫ લાખની મસમોટી લાંચ લેતા રંગેહાથ ઝડપી પાડવામાં આવ્યા છે. આ બંને શખ્સોએ જમીન વળતરના એક કેસમાં ફરિયાદીના પક્ષમાં રિપોર્ટ આપવા માટે કુલ ₹૪૦ લાખની માંગણી કરી હતી.
ફરિયાદી ગુરચરણ સિંહ સરદારે આ અંગે એસીબીને જાણ કરતા ટીમ એક્શન મોડમાં આવી હતી. યોજના મુજબ, જ્યારે ફરિયાદી લાંચના પ્રથમ હપ્તા તરીકે ₹૫ લાખ આપવા પહોંચ્યા, ત્યારે આસપાસ છુપાયેલી એસીબીની ટીમે તરાપ મારીને બંને આરોપીઓને દબોચી લીધા હતા.
 
ભ્રષ્ટાચારનું આખું નેટવર્ક એસીબીના રડારમાં
આ કાર્યવાહી બાદ સરાઈકેલા અને જમશેદપુરના વહીવટી વર્તુળોમાં ફફડાટ વ્યાપી ગયો છે. એસીબી દ્વારા કરવામાં આવેલી આ વર્ષની કેટલીક મોટી કાર્યવાહીઓ નીચે મુજબ છે:
•    તા.૧૯ માર્ચ: બરહરવામાં બ્લોક સપ્લાય ઓફિસર નિરંજન કુમાર ₹૫૦,૦૦૦ ની લાંચ લેતા ઝડપાયા.
•    તા.૧૭ માર્ચ: બોકારોમાં રેલવેના જુનિયર એન્જિનિયર ₹૧૫,૦૦૦ લેતા સીબીઆઈના હાથે પકડાયા.
•    તા.૧૩ માર્ચ: દેવઘરમાં રિંગ રોડ પ્રોજેક્ટના વળતર માટે કમિશન માંગતા બે કર્મચારીઓ જેલ ભેગા થયા.
•    તા.૧૨ માર્ચ: કોડરમામાં સબ-ઇન્સ્પેક્ટર અને ગુમલામાં પંચાયત સચિવ લાંચ લેતા ઝડપાયા.
 
જનતાને એસીબીની અપીલ: ડરશો નહીં, જાણ કરો
એસીબીએ ધરપકડ કરાયેલા આરોપી પ્રીતમ આચાર્ય અને વચેટિયાની અપ્રમાણસર મિલકતોની તપાસ પણ શરૂ કરી દીધી છે. બ્યુરોએ જાહેર જનતાને સ્પષ્ટ સંદેશ આપ્યો છે કે કોઈપણ સરકારી કામ માટે લાંચ આપવાની જરૂર નથી. જો કોઈ અધિકારી કે કર્મચારી નાણાંની માંગણી કરે, તો તાત્કાલિક એન્ટી કરપ્શન બ્યુરોનો સંપર્ક કરવો.
ઝારખંડમાં વધી રહેલા ભ્રષ્ટાચાર સામે એસીબીની આ સતત કાર્યવાહીથી લાંચિયા તત્વોમાં ફફડાટ જોવા મળી રહ્યો છે. હાલમાં બંને આરોપીઓની સઘન પૂછપરછ માટે તેમને જમશેદપુર લઈ જવામાં આવ્યા છે.