તહેરાન,તા.૨૪: આંતરરાષ્ટ્રીય ડિજિટલ પ્‍લેટફોર્મ 'એક્‍સ' અને રપ્‍ટલી ન્‍યૂઝ એજન્‍સીના અહેવાલો મુજબ હોર્મુઝની ખાડી પાર કરી રહેલા એક અમેરિકન ઓઈલ ટેન્‍કરને ઈરાને પોતાના નિયંત્રણમાં લીધું છે. આ ઘટનાથી ક્રૂડ ઓઈલ સપ્‍લાય અને વૈશ્વિક સુરક્ષા પર મોટું સંકટ ઊભું થઈ શકે છે.

પ્રાપ્ત માહિતી અનુસાર, જ્‍યારે આ અમેરિકન જહાજ વ્‍યૂહાત્‍મક રીતે મહત્‍વપૂર્ણ એવા સમુદ્રી માર્ગમાંથી પસાર થવાનો પ્રયાસ કરી રહ્યું હતું, ત્‍યારે ઈરાની નૌકાદળે તેને ઘેરી લીધું હતું.

હાલમાં અમેરિકા અને ઈરાન વચ્‍ચે ભારે લશ્‍કરી તણાવ ચાલી રહ્યો છે. અંગ્રેજી, હિન્‍દી અને ઉર્દુ ડિજિટલ મીડિયાના વિવિધ રિપોર્ટ્‍સ મુજબ, આ વિસ્‍તારમાં વ્‍યાપારી જહાજો પર સતત નજર રાખવામાં આવી રહી છે. આંતરરાષ્ટ્રીય સમુદાય અને સંયુક્‍ત રાષ્ટ્ર પણ આ ઘટનાક્રમ પર ચાંપતી નજર રાખી રહ્યા છે.

દરરોજ લાખો બેરલ ઓઈલનું વહન કરતા આ સમુદ્રી માર્ગ પર કોઈપણ અવરોધ ભારત સહિતના એશિયન દેશો માટે પણ આર્થિક ફટકો સાબિત થઈ શકે છે. અમેરિકી નૌસેના દ્વારા આ વિસ્‍તારમાં પેટ્રોલિગ વધારી દેવામાં આવ્‍યું હોવાના અહેવાલો પણ છે. જો આ વાયરલ દાવો સાચો સાબિત થશે તો તેલના વૈશ્વિક બજારમાં મોટી ઉથલપાથલ મચી શકે છે અને બંને દેશો વચ્‍ચે યુદ્ધની પરિસ્‍થિતિ વધુ ગંભીર બની શકે છે.