નેયાફુ, તા.૨૪: દક્ષિણ પેસિફિક મહાસાગરમાં આવેલા ટોંગા ટાપુઓ પાસે મંગળવારે કુદરતનો પ્રચંડ કહેર જોવા મળ્‍યો હતો. રિક્‍ટર સ્‍કેલ પર ૭.૬ની વિનાશક તીવ્રતા ધરાવતા ભૂકંપે આખા દરિયાઈ પટ્ટાને ધ્રુજાવી દીધો હતો. જોકે, રાહતની વાત એ રહી કે આ ભૂકંપ જમીનથી આશરે ૨૩૭ કિલોમીટરની અસાધારણ ઊંડાઈએ આવ્‍યો હતો. નિષ્‍ણાતોના મતે, જો આ ધ્રુજારી સપાટીની નજીક (૧૦-૨૦ કિમી) હોત, તો ટોંગાના ટાપુઓ પર સુનામી અને કાટમાળ સિવાય કશું બચ્‍યું ન હોત. હાલમાં નેયાફુ શહેરથી ૧૫૩ કિમી દૂર સમુદ્રના પેટાળમાં આ હિલચાલ નોંધાઈ છે.

ભૂગોળની દ્રષ્ટિએ ટોંગા પેસિફિક રિંગ ઓફ ફાયર પર સ્‍થિત છે, જ્‍યાં ટેક્‍ટોનિક પ્‍લેટોની સતત અથડામણને કારણે ધરતીકંપ અને જ્‍વાળામુખી ફાટવાની ઘટનાઓ સામાન્‍ય છે. આ વખતે ભૂકંપની તીવ્રતા વધુ હોવા છતાં, વધુ ઊંડાઈને કારણે ઉર્જા સપાટી સુધી પહોંચતા નબળી પડી ગઈ હતી. પરિણામે, દરિયાકાંઠાના ગામડાઓમાં રહેતી વસ્‍તીને મોટા આંચકા અનુભવાયા હોવા છતાં કોઈ જાનહાનિ કે ઈમારતો ધરાશાયી થવાના અહેવાલ મળ્‍યા નથી. સ્‍થાનિક પ્રશાસન દ્વારા દરિયાઈ મોજાંની ગતિ પર સતત નજર રાખવામાં આવી રહી છે. ભૂકંપ બાદ ટોંગા સરકાર અને આંતરરાષ્‍ટ્રીય જિઓલોજિકલ એજન્‍સીઓ હાઈ એલર્ટ પર છે. સુનામીની કોઈ સત્તાવાર ચેતવણી આપવામાં આવી નથી, પરંતુ દરિયાકાંઠાના વિસ્‍તારોમાં રહેતા લોકોને સાવચેત રહેવા સૂચના અપાઈ છે. આ ઘટનાએ ફરી એકવાર સાબિત કર્યું છે કે કુદરતી હોનારત સમયે ભૂકંપનું કેન્‍દ્ર કેટલું ઊંડું છે તે જ જીવન અને મરણ વચ્‍ચેનું અંતર નક્કી કરે છે. હાલમાં પરિસ્‍થિતિ નિયંત્રણમાં છે અને ટાપુઓ પર જનજીવન સામાન્‍ય બની રહ્યું છે.