ટુંક સમયમાં યુધ્ધ સમાપ્ત થવાના એંધાણ
ઈરાનના સુપ્રિમ લીડર મોજતબા ખામેનેઈ અમેરિકા સાથે મંત્રણા કરવા માટે રાજી થયા : અલ અરેબિયાનો ઈઝરાયલી મીડિયાને ટાંકીને દાવોઃ અમેરિકાનો ૧૫ સુત્રી પ્રસ્તાવ ઈરાન પહોંચ્યો
તહેરાન,તા.૨૪: ઈરાન-યુએસ યુદ્ધના અંત તરફ વધુ એક મોટી અપડેટ સામે આવી રહી છે. અલ અરેબિયાના એક અહેવાલ મુજબ, મોજતબા ખામેનીએ અમેરિકા સાથે વાતચીત અને કરાર માટે સંમત થયા છે. જો આ અહેવાલ સાચો નીકળે છે, તો તે લડતા પક્ષો વચ્ચે શાંતિની શક્યતા વધારશે. અલ અરેબિયાએ ઇઝરાયલી મીડિયાને ટાંકીને આ વાત કહી છે. આ માહિતી એવા સમયે આવી છે જ્યારે ડોનાલ્ડ ટ્રમ્પ વારંવાર કહી રહ્યા છે કે ઈરાની નેતૃત્વ સાથે તેમની વાતચીત ચાલુ છે અને યુદ્ધનો ઉકેલ ટૂંક સમયમાં આવી શકે છે.
સંઘર્ષના ૨૪મા દિવસે, યુએસ પ્રમુખ ડોનાલ્ડ ટ્રમ્પે જણાવ્યું હતું કે વોશિગ્ટન અને તેહરાન વચ્ચે તાજેતરની વાટાઘાટોમાં ઘણા મુખ્ય મુદ્દાઓ પર સમજૂતી થઈ છે. તેમણે કહ્યું હતું કે આ વાટાઘાટો ચાલુ રહેશે અને ટૂંક સમયમાં એક કરાર થઈ શકે છે. જોકે તેમણે વાટાઘાટકાર તરીકે ઈરાની સ્પીકર મોહમ્મદ બાઘર ગાલિબાફનું નામ આપ્યું હતું, પરંતુ હવે અહેવાલો સૂચવે છે કે ઈરાની સુપ્રીમ લીડર મોજતબા ખામેની વાટાઘાટો માટે સંમત થયા છે.
ટ્રમ્પે જણાવ્યું હતું કે તેમના રાજદૂત, સ્ટીવ વિટકોફ અને તેમના નજીકના સલાહકાર, જેરેડ કુશનર પણ આ વાટાઘાટોમાં સામેલ હતા. તેમણે એમ પણ કહ્યું હતું કે અમેરિકા એક મુખ્ય ઈરાની નેતા સાથે વાટાઘાટો કરી રહ્યું છે. જો કે, ઈરાનની ફાર્સ ન્યૂઝ એજન્સીએ આ દાવાઓને ફગાવી દીધા હતા, અને કહ્યું હતું કે અમેરિકા અને ઈરાન વચ્ચે કોઈ સીધી કે પરોક્ષ વાટાઘાટો થઈ રહી નથી. દરમિયાન, ટ્રમ્પે દાવો કર્યો હતો કે વાટાઘાટો લાંબા સમયથી ચાલી રહી છે, પરંતુ હવે વધુ ગંભીર તબક્કામાં પહોંચી ગઈ છે. તેમણે જણાવ્યું હતું કે અમેરિકાએ ઈરાનને પાંચ દિવસનો સમય આપ્યો છે, જે દરમિયાન કોઈ મોટો કરાર થઈ શકે છે. ઈરાને સત્તાવાર રીતે આ વાતની પુષ્ટિ કરી નથી, જોકે વિદેશ મંત્રાલયે જણાવ્યું હતું કે અમેરિકાનો ૧૫-મુદ્દાનો પ્રસ્તાવ તેમના સુધી પહોંચ્યો છે, પરંતુ મધ્યસ્થી દ્વારા.
ટ્રમ્પે એમ પણ કહ્યું હતું કે ઈરાનના પાવર પ્લાન્ટ અને ઉર્જા માળખા પર હુમલા હાલ પૂરતા મુલતવી રાખવામાં આવ્યા છે. ઈરાને હુમલો કરવામાં આવશે તો અમેરિકા અને ઇઝરાયલી ઠેકાણાઓને નિશાન બનાવવાની ધમકી આપ્યા બાદ આ નિર્ણય લેવામાં આવ્યો છે. અગાઉ, ટ્રમ્પે ચેતવણી આપી હતી કે જો ઈરાન હોર્મુઝ સ્ટ્રેટ ખોલશે નહીં, તો તેના પાવર પ્લાન્ટ પર હુમલો કરવામાં આવશે. હાલમાં, ઈરાનના પગલાંએ આ મહત્વપૂર્ણ દરિયાઈ માર્ગને મોટાભાગે અવરોધિત કર્યો છે, જેના કારણે વિશ્વના તેલ અને ગેસ પુરવઠાના લગભગ ૨૦% ભાગને અસર થઈ છે. ૨૮ ફેબ્રુઆરીથી શરૂ થયેલા યુદ્ધમાં ૨,૦૦૦ થી વધુ લોકો માર્યા ગયા છે અને વૈશ્વિક બજારોમાં ગભરાટ ફેલાયો છે.
(3:01 PM IST)
છેલ્લા 8 દિવસમાં સૌથી લોકપ્રિય 
