વોશિંગ્ટન: ઈરાન વિરુદ્ધ અમેરિકા અને ઈઝરાયેલનું સૈન્ય અભિયાન હવે ચોથા અઠવાડિયામાં પ્રવેશી ગયું છે, ત્યારે વિશ્વના સૌથી શક્તિશાળી નેતા ડોનાલ્ડ ટ્રમ્પના એક નિવેદને આંતરરાષ્ટ્રીય સ્તરે ખળભળાટ મચાવી દીધો છે. ટ્રમ્પે ખુલ્લેઆમ સ્વીકાર્યું છે કે ઈરાન પર હુમલો કરવાનો નિર્ણય લેવામાં તેમના સંરક્ષણ સચિવ પીટ હેગસેથની ભૂમિકા સૌથી મહત્વની હતી. મેમ્ફિસમાં આયોજિત એક રાઉન્ડ ટેબલ બેઠક દરમિયાન ટ્રમ્પે હેગસેથ તરફ આંગળી ચીંધતા કહ્યું કે, "પીટ, તમે જ પહેલા વ્યક્તિ હતા જેણે કહ્યું હતું કે આપણે આ કરવું જ પડશે."
યુદ્ધ પાછળનું ટ્રમ્પનું ગણિત
ટ્રમ્પના જણાવ્યા અનુસાર, ઈરાનને કોઈપણ સંજોગોમાં પરમાણુ હથિયાર વિકસાવતા રોકવા એ તેમની સર્વોચ્ચ પ્રાથમિકતા હતી. તેમણે જણાવ્યું કે, "મેં પીટ અને જનરલ કેન સાથે વાત કરી હતી. આપણી પાસે બે જ વિકલ્પ હતા: કાં તો શાંત બેસી રહીને જોખમ વધવા દેવું અથવા તો ટૂંકી સફર (સૈન્ય કાર્યવાહી) કરીને મોટા ખતરાને જડમૂળથી ઉખેડી નાખવો."
ગુપ્ત માહિતી અને નેતન્યાહુ સાથેનું જોડાણ
અહેવાલો મુજબ, ઇઝરાયેલના વડાપ્રધાન બેન્જામિન નેતન્યાહુ સાથેની ફોન પરની વાતચીત બાદ ટ્રમ્પ ઈરાન પર હુમલો કરવા સંમત થયા હતા. ગુપ્તચર એજન્સીઓ પાસેથી મળેલી માહિતી મુજબ ઈરાન પરમાણુ બોમ્બ બનાવવાની ખૂબ જ નજીક હતું, જેણે ટ્રમ્પના નિર્ણયમાં પાયાની ભૂમિકા ભજવી હતી. જોકે, હાલમાં ટ્રમ્પે 48 કલાકના અલ્ટીમેટમ બાદ હુમલાઓ પર કામચલાઉ વિરામની જાહેરાત કરી છે, જે શાંતિની આશા જન્માવે છે.
યુદ્ધના ઉદ્દેશ્યો પર ઉઠતા સવાલ
ફેબ્રુઆરીના અંતમાં શરૂ થયેલા આ સંઘર્ષના મૂળ ક્યાં છે તે અંગે હજુ પણ અનિશ્ચિતતા છે. કેટલાક નિષ્ણાતો માને છે કે ઇઝરાયેલ કોઈપણ સંજોગોમાં હુમલો કરવા તૈયાર હતું, જ્યારે અન્ય માને છે કે ટ્રમ્પ પ્રાદેશિક જોખમોને પૂર્વનિર્ધારિત રીતે ખતમ કરવા માંગતા હતા. પીટ હેગસેથ આ સમગ્ર સૈન્ય અભિયાનનો મુખ્ય ચહેરો રહ્યા છે, પરંતુ ટ્રમ્પના આ નવા નિવેદને વહીવટીતંત્રમાં આંતરિક મતભેદો હોવાના સંકેત આપ્યા છે.
આગામી દિવસોમાં અમેરિકાની રણનીતિ શું રહેશે અને ઈરાન આ અલ્ટીમેટમનો કેવો જવાબ આપશે, તેના પર સમગ્ર વિશ્વની નજર ટકેલી છે.