તેહરાન:  મધ્ય-પૂર્વમાં ચાલી રહેલા ભીષણ યુદ્ધ અને ઈરાની નેતૃત્વ પર તોળાઈ રહેલા ખતરા વચ્ચે તેહરાને પોતાના સૌથી વિશ્વાસુ અને કટ્ટરપંથી યોદ્ધા મોહમ્મદ બાકર ઝોલકાદર પર ભરોસો મૂક્યો છે. ગત ૧૭ માર્ચે ઇઝરાયલી હુમલામાં કદાવર નેતા અલી લારીજાનીના કરુણ મોત બાદ ખાલી પડેલી 'સુપ્રીમ રાષ્ટ્રીય સુરક્ષા પરિષદ'ના સચિવ પદે ઝોલકાદરની નિમણૂક કરવામાં આવી છે. ૧૯૫૪માં જન્મેલા ઝોલકાદર માત્ર એક લશ્કરી અધિકારી નથી, પરંતુ ૧૯૭૯ની ઇસ્લામિક ક્રાંતિના પાયાના પથ્થરોમાંના એક છે. ઈરાની રાષ્ટ્રપતિના કાર્યાલય દ્વારા સોશિયલ મીડિયા પર આ નિમણૂકની પુષ્ટિ કરવામાં આવી છે, જે સૂચવે છે કે ઈરાન હવે પશ્ચિમી દેશો અને ઈઝરાયલ સામે વધુ આક્રમક રણનીતિ અપનાવવાની તૈયારીમાં છે.

બાકર ઝોલકાદરનો ઈતિહાસ લોખંડી શાસન અને ગુપ્ત લશ્કરી ઓપરેશન્સથી ભરેલો છે. ઈરાન-ઈરાક યુદ્ધ દરમિયાન તેમણે 'રમઝાન ગેરિસન'ના કમાન્ડર તરીકે ભૂમિકા ભજવી હતી, જે આગળ જતાં ઈરાનની વિદેશી જાસૂસી સંસ્થા 'કુદ્સ ફોર્સ'નું મૂળ બની હતી. ૨૧ વર્ષ સુધી ઇસ્લામિક રિવોલ્યુશનરી ગાર્ડ કોર્પ્સ (IRGC) માં સેવા આપનાર ઝોલકાદર પર અમેરિકન અધિકારીઓની હત્યા અને ઈરાનના પરમાણુ-મિસાઈલ કાર્યક્રમોમાં સંડોવણીના આરોપો છે, જેના કારણે સંયુક્ત રાષ્ટ્ર (UN) એ તેમના પર વર્ષો પહેલા પ્રતિબંધો લાદ્યા હતા. તેઓ સર્વોચ્ચ નેતા અલી ખામેનીના અત્યંત નજીકના માનવામાં આવે છે અને ૨૦૨૨ થી તેઓ 'એક્સ્પેડિએન્સી ડિસર્નમેન્ટ કાઉન્સિલ'ના સચિવ તરીકે સત્તાના કેન્દ્રમાં રહ્યા છે.

ઝોલકાદરની આ નિમણૂક વ્યૂહાત્મક રીતે અત્યંત ગંભીર માનવામાં આવે છે કારણ કે તેમનો પરિવાર પણ ઈરાની સત્તામાં ઊંડા મૂળ ધરાવે છે. તેમના પત્ની સાદીગેહ બેગમ મહિલા બાબતોના વડા છે, જ્યારે તેમના જમાઈ કાઝેમ ગરીબાબદી પરમાણુ એજન્સી (IAEA) માં ઈરાનનું પ્રતિનિધિત્વ કરે છે. સુધારાવાદી નેતાઓનો વિરોધ કરવામાં અને કટ્ટરપંથી વિચારધારાને વરેલા ઝોલકાદર હવે ઈરાનની સુરક્ષા નીતિઓ નક્કી કરશે. તેહરાનના રાજદ્વારી વર્તુળોમાં ચર્ચા છે કે ઝોલકાદરનું આગમન અમેરિકા અને ઈઝરાયલ માટે વાટાઘાટોના ટેબલ પર વધુ મુશ્કેલીઓ ઉભી કરી શકે છે, કારણ કે તેઓ 'સંવાદ' કરતા 'પ્રતિકાર'માં વધુ માને છે.