રાયપુર:  કેન્દ્રીય ગૃહમંત્રી અમિત શાહ અને છત્તીસગઢ સરકારના 'ઝીરો ટોલરન્સ' અભિયાનને અત્યાર સુધીની સૌથી મોટી અને ઐતિહાસિક સફળતા મળી છે. દાયકાઓથી બસ્તરના જંગલોમાં લોહીની હોળી ખેલનાર અને સુરક્ષા દળો માટે સૌથી મોટો પડકાર બનેલો કુખ્યાત નક્સલી કમાન્ડર પાપા રાવ આખરે ઘૂંટણિયે પડ્યો છે. ₹25 લાખનું તોતિંગ ઇનામ ધરાવતા આ કમાન્ડરે નિર્ધારિત સમયમર્યાદા પહેલા જ પોતાના 18 સશસ્ત્ર સાથીઓ (જેમાં 8 મહિલા નક્સલીઓ સામેલ છે) સાથે આત્મસમર્પણ કરી દીધું છે. આ શરણાગતિ માત્ર એક વ્યક્તિનો ત્યાગ નથી, પરંતુ નક્સલીઓના સૌથી શક્તિશાળી ગણાતા 'દંડકારણ્ય સ્પેશિયલ ઝોનલ કમિટી' (DKSZC) ના અંતની સત્તાવાર જાહેરાત સમાન છે. પાપા રાવે આત્મસમર્પણ બાદ સ્પષ્ટપણે સ્વીકાર્યું છે કે હિંસાના માર્ગે ક્યારેય ભલું થવાનું નથી અને હવે તે ભારતીય બંધારણના દાયરામાં રહીને જનતાની સેવા કરશે.

આ ઓપરેશનની સફળતાની વિગતો આપતા રાજ્યના નાયબ મુખ્યમંત્રી અને ગૃહમંત્રી વિજય શર્માએ જણાવ્યું હતું કે, આ શરણાગતિ સાથે જ જપ્ત કરાયેલા હથિયારોનો જથ્થો ચોંકાવનારો છે. શરણે આવેલા નક્સલીઓ પાસેથી 8 નંગ AK-47, હાઇ-ટેક SLR અને ઇન્સાસ (INSAS) જેવી અત્યાધુનિક રાઇફલો મળી આવી છે. પાપા રાવ એ જ માસ્ટરમાઇન્ડ છે જેણે 2010ના ભયાનક તડમેટલા હુમલા સહિત અનેક લોહિયાળ ઘટનાઓને અંજામ આપ્યો હતો. ગૃહમંત્રીએ ગૌરવ સાથે જાહેર કર્યું કે હવે છત્તીસગઢમાં પાપા રાવના કદનો એક પણ મોટો નક્સલી નેતા સક્રિય નથી, જે સૂચવે છે કે રાજ્ય હવે "લાલ આતંક" ના કાળા પડછાયામાંથી સંપૂર્ણપણે મુક્ત થવાની આરે છે. કવર્ધા ખાતે પત્રકારો સાથે વાત કરતા તેમણે ઉમેર્યું કે, બસ્તરના અબુઝમાડના જંગલો જે ક્યારેય નક્સલીઓનો ગઢ ગણાતા હતા, ત્યાં હવે વિકાસના કિરણો પહોંચી રહ્યા છે.

કેન્દ્ર સરકારે છત્તીસગઢને સશસ્ત્ર નક્સલવાદથી મુક્ત કરવા માટે 31 માર્ચ, 2026ની જે આખરી તારીખ નક્કી કરી હતી, તે લક્ષ્ય હવે સમય પહેલા જ પૂર્ણ થતું જણાય છે. આંકડાકીય વિશ્લેષણ મુજબ, જાન્યુઆરી 2024 થી અત્યાર સુધીમાં સરકારની આકર્ષક પુનર્વસન નીતિથી પ્રભાવિત થઈને અંદાજે 2,871 નક્સલીઓએ શસ્ત્રો ત્યાગી દીધા છે. હાલમાં જંગલોમાં છૂટાછવાયા સશસ્ત્ર નક્સલીઓની સંખ્યા ઘટીને 50 થી પણ ઓછી રહી ગઈ છે. પાપા રાવ જેવા કદાવર નેતાના આ નિર્ણયથી હવે હેમલા બિચ્ચા અને સોઢી કેશા જેવા બાકી રહેલા જૂજ કમાન્ડરો પર પણ ભારે મનોવૈજ્ઞાનિક દબાણ સર્જાયું છે. બસ્તર હવે ગોળીઓના અવાજથી નહીં, પણ લોકશાહીના ઉત્સવથી ગુંજવા તૈયાર છે, જે અમિત શાહના વ્યૂહાત્મક નેતૃત્વની જીત માનવામાં આવે છે.