સિલ્હટ: બાંગ્લાદેશના સાંસ્કૃતિક વારસા સમાન ગણાતા બાઉલ સંગીત પર ફરી એકવાર કટ્ટરપંથી તત્વોએ નિશાન સાધ્યું છે. સિલ્હટ જિલ્લાના વિશ્વનાથ ઉપજિલ્લામાં ઇબ્રાહિમ શાહ મંદિર નજીક આયોજિત પરંપરાગત બાઉલ સંગીત મેળાવડામાં રવિવારે રાત્રે હિંસક હુમલો થયો હતો. આ હુમલાને કારણે ત્રણ દિવસીય આધ્યાત્મિક ઉત્સવમાં વિક્ષેપ પડ્યો હતો અને ભક્તોમાં ભયનો માહોલ ફેલાયો હતો.
સ્ટેજ પર તાંડવ અને તોડફોડ
પ્રત્યક્ષદર્શીઓના જણાવ્યા અનુસાર, ૧૦૦થી વધુ લોકોના ટોળાએ અચાનક કાર્યક્રમ સ્થળ પર ધસી આવી ધાર્મિક સૂત્રોચ્ચાર શરૂ કર્યા હતા. તોફાની તત્વોએ સ્ટેજ પર ચઢીને સંગીતનાં કિંમતી સાધનો, સાઉન્ડ સિસ્ટમ અને બેઠક વ્યવસ્થામાં ભારે તોડફોડ કરી હતી. સોશિયલ મીડિયા પર વાયરલ થયેલા વીડિયોમાં હુમલાખોરો આયોજકોને ભવિષ્યમાં આવા કાર્યક્રમો ન યોજવા માટે ધમકાવતા જોવા મળે છે. આ હુમલાને કારણે દેશના ખૂણેખૂણેથી આવેલા ભક્તો અને કલાકારોને જીવ બચાવવા ભાગવું પડ્યું હતું.
પોલીસની ઢીલી કામગીરી પર સવાલો
આટલી મોટી હિંસક ઘટના છતાં સ્થાનિક પોલીસનું વલણ ટીકાપાત્ર રહ્યું છે. પોલીસ અધિકારીઓએ આ ઘટનાને 'મોટા અવાજે સંગીત વગાડવા' ને કારણે ઉભો થયેલો સામાન્ય તણાવ ગણાવીને મામલો થાળે પાડવાનો પ્રયાસ કર્યો છે. પોલીસે જણાવ્યું કે આ ઘટના મંદિર પરિસરની બહાર બની હતી અને બંને પક્ષો વચ્ચે સમાધાન થઈ રહ્યું હોવાથી કોઈ સત્તાવાર કેસ દાખલ કરવામાં આવ્યો નથી.
સાંસ્કૃતિક વારસા પર ખતરો
બાઉલ સંગીત તેના આધ્યાત્મિક અને સર્વધર્મ સમભાવના સંદેશ માટે જાણીતું છે, જેને યુનેસ્કો દ્વારા પણ માન્યતા મળેલી છે. જોકે, બાંગ્લાદેશમાં લાંબા સમયથી રૂઢિચુસ્ત જૂથો દ્વારા આ પરંપરાનો વિરોધ કરવામાં આવે છે. ટીકાકારોનું માનવું છે કે કાનૂની કાર્યવાહીનો અભાવ આવી ઘટનાઓને પ્રોત્સાહન આપે છે, જે બાંગ્લાદેશના વૈવિધ્યસભર સાંસ્કૃતિક વારસાને નુકસાન પહોંચાડી શકે છે.
અધિકારીઓ ભલે પરિસ્થિતિ શાંત હોવાનો દાવો કરતા હોય, પરંતુ આ ઘટનાએ બાંગ્લાદેશમાં કલાની આઝાદી અને ધાર્મિક સંવેદનશીલતા વચ્ચેના નાજુક સંતુલન પર ફરી એકવાર ગંભીર પ્રશ્નાર્થ ચિન્હ મૂક્યું છે.