અમદાવાદ: ગુજરાતની ધરતી પરથી રમતગમત ક્ષેત્રે એક નવો ઈતિહાસ લખાઈ રહ્યો છે. અદાણી સ્પોર્ટ્સલાઇને આજે તેના મહત્વાકાંક્ષી પ્રોગ્રામ 'ગર્વ હૈ' ની સત્તાવાર જર્સીનું ભવ્ય અનાવરણ કર્યું છે. ભારતની આગામી પેઢીના રમતવીરોને પ્રોત્સાહન આપતી આ પહેલ હેઠળ હવે દેશના ટોચના એથ્લેટ્સ એક સમાન અને શક્તિશાળી ઓળખ સાથે મેદાનમાં ઉતરશે. પ્રખ્યાત ડિઝાઇનર આકિબ વાની દ્વારા તૈયાર કરવામાં આવેલી આ જર્સી ભારતની રમતગમત સંસ્કૃતિમાં નવો પ્રાણ ફૂંકશે.
ડિઝાઇનમાં છુપાયેલી છે ભારતની શાન
આ જર્સી માત્ર રમતગમતના કપડાં નથી, પરંતુ ભારતના યુવાનોના સપના અને ગૌરવનું પ્રતિબિંબ છે. એવોર્ડ વિજેતા ડિઝાઇનર આકિબ વાની, જેમણે અગાઉ ભારતીય ક્રિકેટ ટીમ અને ઓલિમ્પિક ટુકડી માટે કિટ ડિઝાઇન કરી છે, તેમણે આ જર્સીમાં યુવાની, ગૌરવ અને શ્રેષ્ઠતાના મૂલ્યોને વણી લીધા છે. ચેસના જાદુગર આર. પ્રજ્ઞાનંધા અને નુપુર શિયોરન જ્યારે આ જર્સી પહેરીને કેમેરા સામે આવ્યા ત્યારે તેમની આંખોમાં દેશ માટે કંઈક કરી છૂટવાનો આત્મવિશ્વાસ સ્પષ્ટ દેખાતો હતો.
'ગર્વ હૈ' પ્રોગ્રામ: ચેમ્પિયન્સની નવી ફેક્ટરી
અદાણી સ્પોર્ટ્સલાઇનના ચીફ બિઝનેસ ઓફિસર સંજય આદેસરાએ જણાવ્યું હતું કે, "આ જર્સી એથ્લેટ્સ વચ્ચે એકતા અને આકાંક્ષાનું પ્રતીક છે. આકિબ વાનીએ અગાઉ અદાણી અમદાવાદ મેરેથોન માટે પણ અદભૂત જર્સી બનાવી હતી અને આ વખતે પણ તેમણે કલા અને રમતગમતના સંગમને નવી ઊંચાઈ આપી છે." 'ગર્વ હૈ' કાર્યક્રમ હેઠળ પ્રજ્ઞાનંધા ઉપરાંત પોયમંટી બૈસ્ય, મનીષા ગઢિયા અને લક્ષ્મી જડલા જેવા અનેક પ્રતિભાશાળી ખેલાડીઓને પાયાના સ્તરથી આંતરરાષ્ટ્રીય પ્લેટફોર્મ સુધી પહોંચાડવા માટે ટેકો આપવામાં આવે છે.
આકિબ વાનીનો જાદુ અને ખેલાડીઓનો ઉત્સાહ
પોતાની ડિઝાઇન વિશે વાત કરતા આકિબ વાનીએ કહ્યું કે, "આટલા પ્રતિભાશાળી ખેલાડીઓને એક ઓળખ હેઠળ લાવવા તે મારા માટે ગૌરવની વાત છે. આ ડિઝાઇન ખેલાડીઓની સ્થિતિસ્થાપકતા અને મહત્વાકાંક્ષાને દર્શાવે છે." ૨૦૧૯ માં શરૂ થયેલી અદાણી સ્પોર્ટ્સલાઇનનો ઉદ્દેશ્ય ભારતને વૈશ્વિક રમતગમત રાષ્ટ્ર બનાવવાનો છે. આ નવી જર્સી સાથે હવે ભારતીય ખેલાડીઓ જ્યારે આંતરરાષ્ટ્રીય સ્તરે સ્પર્ધા કરશે, ત્યારે આખો દેશ કહેશે - "ગર્વ હૈ!"