ભુવનેશ્વર, તા.૨૫: ઓડિશાના રહેવાસીઓ જેઓ વિદેશ પ્રવાસ કે અભ્યાસ માટે જવા માંગે છે તેમના માટે એક ખૂબ જ રાહતના સમાચાર આવ્યા છે. ઓડિશા સરકારે સોમવારે ભુવનેશ્વરમાં એક અત્યાધુનિક વિઝા એપ્લિકેશન સેન્ટર (Visa Application Centre) સ્થાપવા માટે વિશ્વ વિખ્યાત 'VFS ગ્લોબલ ગ્રુપ' સાથે ઐતિહાસિક ત્રિપક્ષીય કરાર પર હસ્તાક્ષર કર્યા છે. આ સુવિધા કાર્યરત થતા જ ઓડિશાવાસીઓએ હવે વિઝા પ્રક્રિયા માટે કોલકાતા, દિલ્હી કે હૈદરાબાદ જેવા મોટા શહેરો સુધી લાંબા થવાની જરૂર નહીં રહે.
બસ ટર્મિનલ પર જ મળશે 'ગ્લોબલ' સુવિધા
આ વિઝા કેન્દ્ર ભુવનેશ્વરના આલીશાન 'બાબાસાહેબ ભીમ રાવ આંબેડકર બસ ટર્મિનલ' (BSABT) ખાતે સ્થાપવામાં આવશે. રાજ્ય સરકારે આ માટે લગભગ ૩,૦૦૦ ચોરસ ફૂટ જેટલી વિશાળ જગ્યા ફાળવી છે. ૧૧ એકરમાં ફેલાયેલું આ ટર્મિનલ ઓડિશાનું સૌથી મોટું પરિવહન કેન્દ્ર છે, જ્યાંથી દરરોજ ૨૦,૦૦૦ થી વધુ મુસાફરો પસાર થાય છે. હવે આ જ સ્થળેથી લોકો વિદેશ જવા માટેની કાનૂની પ્રક્રિયા પણ પૂરી કરી શકશે.
IT કંપનીઓ માટે પણ લાલ જાજમ
માત્ર વિઝા જ નહીં, પણ ભુવનેશ્વર વિકાસ સત્તામંડળ (BDA) એ આ ટર્મિનલને એક 'બિઝનેસ હબ' બનાવવાની યોજના તૈયાર કરી છે. ટર્મિનલના બે માળ પર આશરે ૭૭,૦૦૦ ચોરસ ફૂટ જગ્યા IT અને ટેકનોલોજી કંપનીઓને ફાળવવામાં આવશે. આ માટે ઓડિશા કમ્પ્યુટર એપ્લિકેશન સેન્ટર (OCAC) સાથે પણ કરાર કરવામાં આવ્યા છે. આ પગલાથી પરિવહન, વિઝા સેવાઓ અને આધુનિક ટેકનોલોજી એક જ છત નીચે ઉપલબ્ધ થશે.
મુખ્યમંત્રીની દ્રષ્ટિ અને વિકાસ
ગયા ડિસેમ્બરમાં મુખ્યમંત્રી મોહન ચરણ માઝીએ આ પ્રસ્તાવને મંજૂરી આપી હતી, જેનો ઉદ્દેશ્ય ઓડિશાના સામાન્ય નાગરિકોની મુશ્કેલીઓ ઓછી કરવાનો અને રાજ્યમાં આંતરરાષ્ટ્રીય કનેક્ટિવિટી વધારવાનો છે. BDA ના વાઇસ-ચેરમેન ચંચલ રાણાએ જણાવ્યું હતું કે આ કેન્દ્ર કાર્યરત થવાથી ઓડિશાના યુવાનો અને પ્રવાસીઓ માટે નવી તકો ખુલશે.
હવે ઓડિશા માત્ર મંદિરો અને સંસ્કૃતિનું જ નહીં, પણ આધુનિક સેવાઓનું પણ મુખ્ય કેન્દ્ર બનવા તરફ ઝડપથી આગળ વધી રહ્યું છે.