નવી દિલ્હી, તા.25: રાજધાની દિલ્હી અને તેની આસપાસના વિસ્તારો (NCR)માં રહેતા લોકો માટે હવામાન વિભાગે મહત્વની ચેતવણી જારી કરી છે. લાંબા સમયના ઉકાળા અને ગરમી બાદ હવે આકાશમાં વાદળોનું સામ્રાજ્ય સ્થપાવા જઈ રહ્યું છે. હવામાન વિભાગ (IMD) અનુસાર, બે નવા પશ્ચિમી વિક્ષેપો (Western Disturbances) સક્રિય થવાને કારણે આગામી ચાર દિવસ સુધી દિલ્હી-NCRમાં હવામાન કઠોર રહેશે. આ દરમિયાન ભારે પવન ફૂંકાવાની સાથે હળવોથી મધ્યમ વરસાદ પડવાની પૂરેપૂરી સંભાવના છે.
26 માર્ચથી શરૂ થશે વરસાદી સ્પેલ
હવામાન વિભાગની આગાહી મુજબ, આવતીકાલે એટલે કે 26 માર્ચ, ગુરુવારથી વાતાવરણમાં મોટો પલટો આવશે. બપોર પછી આકાશ વાદળછાયું રહેશે અને સાંજ સુધીમાં ગાજવીજ સાથે ઝરમર વરસાદ શરૂ થઈ શકે છે. આ સમયગાળા દરમિયાન પવનની ગતિ 20 થી 30 કિલોમીટર પ્રતિ કલાક રહેશે, જે વધીને 40 કિલોમીટર સુધી પહોંચી શકે છે, જેના કારણે ધૂળની ડમરીઓ પણ ઉડી શકે છે.
રવિવાર સુધી રહેશે 'કઠોર' વાતાવરણ
શુક્રવારે પણ સવારથી જ વાદળછાયું વાતાવરણ રહેશે અને હળવો વરસાદ ચાલુ રહેશે. શનિવારે હવામાન થોડું શાંત રહેશે, પરંતુ રવિવાર, 29 માર્ચના રોજ ફરી એકવાર પવનનું જોર વધશે. રવિવારે 30 થી 40 કિલોમીટરની ઝડપે ફૂંકાતા પવનો અને ગાજવીજ સાથેનો વરસાદ રજાના દિવસની મજા બગાડી શકે છે. 30 માર્ચના રોજ પણ વરસાદની ચેતવણી યથાવત રાખવામાં આવી છે, જ્યારે 31 માર્ચથી આકાશી આફતમાંથી મુક્તિ મળે તેવી શક્યતા છે.
તાપમાન અને પ્રદૂષણની સ્થિતિ
હાલમાં દિલ્હીમાં લઘુત્તમ તાપમાન 16.4 ડિગ્રી સેલ્સિયસ નોંધાયું છે, જે સામાન્ય કરતા ઓછું છે. વરસાદને કારણે તાપમાનમાં હજુ પણ ઘટાડો થશે, જેનાથી રાત્રિના સમયે ગુલાબી ઠંડીનો અહેસાસ થઈ શકે છે. બીજી તરફ, દિલ્હીનો વાયુ ગુણવત્તા સૂચકાંક (AQI) 185 નોંધાયો છે, જે 'મધ્યમ' શ્રેણીમાં આવે છે. વરસાદ પછી પ્રદૂષણના સ્તરમાં વધુ સુધારો થવાની આશા સેવાઈ રહી છે.
હવામાન વિભાગે લોકોને સલાહ આપી છે કે ખરાબ હવામાન દરમિયાન ઊંચા વૃક્ષો અને નબળા બાંધકામોથી દૂર રહેવું, કારણ કે પવનની ગતિ નુકસાન પહોંચાડી શકે છે.