તેહરાન/જીનીવા: મિડલ ઈસ્ટમાં યુદ્ધ હવે અત્યંત ભયાવહ વળાંક પર પહોંચી ગયું છે. પ્રાપ્ત સત્તાવાર અહેવાલો અનુસાર, ઇઝરાયલી સંરક્ષણ દળો (આઈડીએફ) દ્વારા ઈરાનના સબમરીન બનાવતા એકમાત્ર અને સૌથી મોટા કેન્દ્ર પર અત્યંત ભીષણ એરસ્ટ્રાઇક કરવામાં આવી છે. આ હુમલાને કારણે ઈરાનની નૌકાદળ અને સંરક્ષણ ક્ષમતાને ભારે નુકસાન પહોંચ્યું હોવાના અહેવાલો છે. 
ઇઝરાયલનો હેતુ ઈરાનની દરિયાઈ તાકાતને સંપૂર્ણપણે નષ્ટ કરવાનો હોવાનું માનવામાં આવે છે. બીજી તરફ, બંને દેશો વચ્ચેની આ લડાઈ હવે સંયુક્ત રાષ્ટ્ર માનવાધિકાર પરિષદ (યુએનએચઆરસી) માં પહોંચી ગઈ છે. યુએનએચઆરસીની તાજેતરની બેઠકમાં આ હુમલાઓ અને તેનાથી નાગરિકો પર પડતી અસરો અંગે ઊંડી ચિંતા વ્યક્ત કરવામાં આવી છે. 
આંતરરાષ્ટ્રીય માનવાધિકાર સંગઠનોએ ચેતવણી આપી છે કે જો આ હુમલાઓ નહીં અટકે તો ગંભીર માનવીય કટોકટી સર્જાશે. ઈરાને ઇઝરાયલના આ પગલાને આંતરરાષ્ટ્રીય કાયદાઓનું ઘોર ઉલ્લંઘન ગણાવ્યું છે અને આકરી જવાબી કાર્યવાહીની ચીમકી આપી છે. યુએનએચઆરસીએ તમામ પક્ષોને તાત્કાલિક યુદ્ધવિરામ કરવા અને નાગરિક માળખાને નિશાન ન બનાવવા અપીલ કરી છે