પણજી: પર્યટકોના સ્વર્ગ ગણાતા ગોવાના દરિયાકિનારે એક લોહિયાળ સંઘર્ષની ઘટના સામે આવતા સનસનાટી મચી ગઈ છે. પ્રખ્યાત કેલાંગુટ બીચ પર મંગળવારે ફરવા આવેલા બેંગલુરુના એક પ્રવાસી પર ત્યાંના સ્થાનિક શૅક (ઝૂંપડી) ના સ્ટાફ દ્વારા ઘાતકી હુમલો કરવામાં આવ્યો હતો. માત્ર સનબેડ પર બેસવા જેવી નજીવી બાબતે થયેલી બોલાચાલીએ ઉગ્ર સ્વરૂપ ધારણ કર્યું હતું, જેમાં ૧૫ થી ૨૦ જેટલા મજૂરોએ પ્રવાસીને ઘેરીને લોખંડના સળિયા અને પાઈપો વડે બેરહેમીથી માર માર્યો હતો.
દરિયામાં નાહ્યા બાદ બેડ પર બેસવું ભારે પડ્યું
મળતી માહિતી મુજબ, બેંગલુરુથી આવેલો પ્રવાસી દરિયામાં નાહીને બહાર આવ્યો અને બીચ પર રાખેલા સનબેડ પર બેઠો હતો. આ સમયે ત્યાંના સ્ટાફ સાથે કોઈ બાબતે વિવાદ થયો હતો. વિવાદ એટલો વણસ્યો કે યુનિફોર્મ પહેરેલા સ્ટાફના સભ્યો ઉશ્કેરાઈ ગયા હતા અને હથિયારો સાથે પ્રવાસી પર તૂટી પડ્યા હતા. હુમલાનો એક ચોંકાવનારો વીડિયો પણ સામે આવ્યો છે, જેમાં સ્ટાફ પ્રવાસીને નિર્દયતાથી ફટકારતો જોવા મળે છે. આ હુમલામાં યુવાનને ગંભીર ઈજાઓ પહોંચી હોવાનું જાણવા મળ્યું છે.
પ્રવાસન મંત્રીના કડક તેવર
ગોવાના પ્રવાસન મંત્રી રોહન ખાઉંટેએ આ ઘટનાને અત્યંત ગંભીર ગણાવી છે. તેમણે જણાવ્યું કે, ગોવાની છબી ખરાબ કરનારા તત્વોને બક્ષવામાં આવશે નહીં. જે શૅકના સ્ટાફે આ કૃત્ય કર્યું છે તેને કારણદર્શક નોટિસ ફટકારવામાં આવી છે. મંત્રીએ સ્પષ્ટ કર્યું છે કે જો યોગ્ય ખુલાસો નહીં મળે તો તે શૅકનું લાયસન્સ કાયમી ધોરણે રદ કરવામાં આવશે અને કડક કાયદાકીય કાર્યવાહી કરવામાં આવશે.
પોલીસ કાર્યવાહી અને ધરપકડ
ઘટનાની જાણ થતા જ ગોવા પોલીસે ત્વરિત કાર્યવાહી હાથ ધરી હતી. વીડિયો ફૂટેજના આધારે હુમલાખોર સ્ટાફની ઓળખ કરી લેવામાં આવી છે અને કેટલાકની ધરપકડ પણ કરવામાં આવી છે. પોલીસ હાલ આ મામલે વધુ તપાસ કરી રહી છે કે શું આ હુમલો અગાઉથી કોઈ અદાવતને કારણે હતો કે પછી ત્વરિત ઉશ્કેરાટનું પરિણામ.
ગોવામાં અવારનવાર પ્રવાસીઓ અને સ્થાનિક સ્ટાફ વચ્ચેના ઘર્ષણના બનાવો સામે આવે છે, પરંતુ આ પ્રકારનો હિંસક હુમલો પ્રવાસન ઉદ્યોગ માટે ચિંતાનો વિષય બન્યો છે.