નવી દિલ્હી: દેશના સામાન્ય નાગરિકનું વિમાનમાં બેસવાનું સપનું સાકાર કરવા માટે કેન્દ્ર સરકારે બુધવારે એક ક્રાંતિકારી નિર્ણય લીધો છે. વડાપ્રધાન નરેન્દ્ર મોદીની અધ્યક્ષતામાં મળેલી કેબિનેટ બેઠકમાં 'પ્રાદેશિક હવાઈ જોડાણ યોજના - સંશોધિત ઉડાન' (UDAN) ને આગામી ૧૦ વર્ષ માટે મંજૂરી આપી દેવામાં આવી છે. ₹૨૮,૮૪૦ કરોડના આ માતબર બજેટ સાથે સરકારનો ઉદ્દેશ્ય દેશના ખૂણેખૂણાને હવાઈ માર્ગે જોડીને આર્થિક વિકાસને નવી ગતિ આપવાનો છે.
120 નવા સ્થળો અને કરોડો મુસાફરોને ફાયદો
માહિતી અને પ્રસારણ મંત્રી અશ્વિની વૈષ્ણવે પત્રકારોને સંબોધતા જણાવ્યું હતું કે, આ સુધારેલી યોજના ૨૦૨૬-૨૭ થી ૨૦૩૫-૩૬ સુધી અમલમાં રહેશે. આ યોજના અંતર્ગત ૧૨૦ નવા સ્થળોને હવાઈ નકશા પર લાવવામાં આવશે, જેનાથી અંદાજે ૪ કરોડ મુસાફરોને સીધો લાભ મળશે. અત્યાર સુધી 'ઉડે દેશ કા આમ નાગરિક' (UDAN) હેઠળ ૯૫ એરપોર્ટ અને ૬૬૩ રૂટ કાર્યરત થઈ ચૂક્યા છે, જેમાં ૧.૬૨ કરોડ મુસાફરોએ મુસાફરી કરી છે. હવે આ આંકડાને નવી ઊંચાઈએ લઈ જવાની તૈયારી છે.
ગામડાં અને પહાડો સુધી પહોંચશે હેલિકોપ્ટર સેવા
સરકારનો ખાસ ભાર પછાત, પર્વતીય અને અંતરિયાળ વિસ્તારો પર છે. આ યોજના હેઠળ આગામી ૮ વર્ષમાં ₹૩,૬૬૧ કરોડના ખર્ચે ૨૦૦ આધુનિક હેલિપેડ વિકસાવવામાં આવશે. આનાથી માત્ર પર્યટન જ નહીં, પરંતુ કટોકટીના સમયે આરોગ્ય સેવાઓ પહોંચાડવામાં પણ મોટી મદદ મળશે. આ ઉપરાંત, પવન હંસ અને એલાયન્સ એર માટે સ્વદેશી HAL ધ્રુવ હેલિકોપ્ટર અને ડોર્નિયર એરક્રાફ્ટ ખરીદવાનો પણ પ્રસ્તાવ છે, જે 'આત્મનિર્ભર ભારત' અભિયાનને વધુ મજબૂત બનાવશે.
એરપોર્ટની જાળવણી માટે મોટી નાણાકીય સહાય
નાના શહેરોના એરપોર્ટને આર્થિક રીતે સક્ષમ બનાવવા માટે સરકારે આગામી ૧૦ વર્ષમાં વાયેબિલિટી ગેપ ફંડિંગ (VGF) પેટે ₹૧૦,૦૪૩ કરોડની ફાળવણી કરી છે. તેમજ ૪૪૧ એરોડ્રોમના સંચાલન અને જાળવણી (O&M) માટે ₹૨,૫૭૭ કરોડનો અલગ ટેકો આપવામાં આવશે. અશ્વિની વૈષ્ણવે ઉમેર્યું કે, આ વિકાસ ભારત ૨૦૪૭ ના વિઝનને અનુરૂપ છે, જે ભારતને વૈશ્વિક ઉડ્ડયન ક્ષેત્રે ટોચ પર લઈ જશે.
આ નિર્ણયથી ટાયર-૨ અને ટાયર-૩ શહેરોમાં વેપાર, રોજગારી અને પ્રવાસન ક્ષેત્રે નવી તકો ઉભી થશે અને સામાન્ય માણસ માટે હવાઈ મુસાફરી વધુ સસ્તી અને સુલભ બનશે.