નવી દિલ્હી: કેન્દ્રીય સંસદીય બાબતોના મંત્રી કિરેન રિજિજુએ ગુરુવારે કોંગ્રેસના વરિષ્ઠ નેતા અને વિપક્ષના નેતા રાહુલ ગાંધી પર આકરા પ્રહારો કર્યા છે. એક કાર્યક્રમમાં બોલતા રિજિજુએ દાવો કર્યો હતો કે રાહુલ ગાંધીનું મન તેમના 'કાર્યકર્તા સલાહકારો' દ્વારા સંપૂર્ણપણે હાઇજેક કરી લેવામાં આવ્યું છે અને તેઓ સંસદમાં માત્ર એટલું જ બોલે છે જેટલું તેમને શીખવવામાં આવે છે.

ટી-શર્ટ પહેરવા પર વાંધો

સંસદમાં રાહુલ ગાંધીના કેઝ્યુઅલ પોશાક, ખાસ કરીને ટી-શર્ટ પહેરવા બાબતે રિજિજુએ નારાજગી વ્યક્ત કરી હતી. તેમણે કહ્યું કે, "મને અંગત રીતે ટી-શર્ટ પહેરવા સામે કોઈ વાંધો નથી, પરંતુ જ્યારે તમે સંસદના ગૃહમાં વિપક્ષના નેતા (LoP) તરીકે બોલતા હોવ, ત્યારે તમારા કપડાં પદની ગરિમાને અનુરૂપ હોવા જોઈએ. યોગ્ય પોશાક પહેરવો એ સંસદીય શિષ્ટાચારનો એક અભિન્ન ભાગ છે."

સોમનાથ ચેટર્જીનું આપ્યું ઉદાહરણ

રિજિજુએ પૂર્વ સ્પીકર સોમનાથ ચેટર્જીનું ઉદાહરણ આપતા સમજાવ્યું કે, તેઓ સ્પીકર બન્યા તે પહેલા ઢીલા શર્ટ અને સેન્ડલ પહેરતા હતા, પરંતુ પદ સંભાળ્યા પછી તેમણે શિષ્ટાચાર મુજબ યોગ્ય પોશાક પહેરવાનું શરૂ કર્યું હતું. રિજિજુએ ઉમેર્યું કે, "રાહુલ ગાંધી સમગ્ર વિપક્ષનું પ્રતિનિધિત્વ કરે છે, તેથી લોકોની અપેક્ષા હોય છે કે તેઓ વધુ સારું વર્તન કરે અને યોગ્ય કપડાંની પસંદગી કરે."

પરંપરાઓ અને નિયમોનું પાલન

મંત્રીએ ભારપૂર્વક જણાવ્યું કે ભાજપ જ્યારે વિપક્ષમાં હતું ત્યારે પણ તેમણે આકરો વિરોધ કર્યો હતો, પરંતુ ક્યારેય મર્યાદા ઓળંગી નહોતી. તેમણે કહ્યું કે રાહુલ ગાંધી સાથે તેમને વ્યક્તિગત કોઈ દુશ્મની નથી, તેઓ બહાર મળે ત્યારે વાત પણ કરે છે, પરંતુ ગૃહની અંદર પરંપરાઓ અને નિયમોનું પાલન કરવું અનિવાર્ય છે. રિજિજુના મતે, રાહુલ ગાંધીને સંસદીય શિષ્ટાચાર સમજવામાં મુશ્કેલી પડી રહી છે.

રિજિજુની આ ટિપ્પણી બાદ હવે સોશિયલ મીડિયા પર ફરી એકવાર 'સંસદમાં ડ્રેસ કોડ' અને 'નેતાઓનું વર્તન' એ ચર્ચાનો વિષય બન્યો છે.