નવી દિલ્હી:  પશ્ચિમ એશિયામાં ચાલી રહેલા ભીષણ સૈન્ય સંઘર્ષ અને તેની વૈશ્વિક અસરોને ધ્યાનમાં રાખીને વડાપ્રધાન નરેન્દ્ર મોદીએ શુક્રવારે તમામ રાજ્યોના મુખ્યમંત્રીઓ સાથે વીડિયો કોન્ફરન્સિંગ દ્વારા મહત્વની બેઠક યોજી હતી. આ બેઠકનો મુખ્ય ઉદ્દેશ્ય ઈરાન અને ઈઝરાયલ વચ્ચેના યુદ્ધને કારણે ભારતના ઉર્જા પુરવઠા અને સુરક્ષા વ્યવસ્થા પર પડનારી સંભવિત અસરોની સમીક્ષા કરવાનો હતો. જોકે, આદર્શ આચારસંહિતા (MCC) લાગુ હોવાને કારણે તમિલનાડુ, પશ્ચિમ બંગાળ, આસામ, કેરળ અને પુડુચેરી જેવા ચૂંટણી-વ્યસ્ત રાજ્યોના મુખ્યમંત્રીઓ આ બેઠકમાં ભાગ લઈ શક્યા ન હતા, પરંતુ આ રાજ્યોના મુખ્ય સચિવો સાથે કેબિનેટ સચિવાલય અલગથી સંપર્ક જાળવી રાખશે.

બેઠક દરમિયાન પીએમ મોદીએ દેશમાં ફેલાઈ રહેલી ઈંધણ અને LPGની અછતની અફવાઓ પર આકરા પ્રહાર કર્યા હતા. વિપક્ષી દળો દ્વારા કરવામાં આવી રહેલા હોબાળા વચ્ચે સરકારે સ્પષ્ટતા કરી છે કે ભારત પાસે આગામી 60 દિવસ માટે પેટ્રોલ અને ડીઝલનો પૂરતો સ્ટોક છે અને LPG ના પુરવઠામાં કોઈ વિક્ષેપ પડશે નહીં. વડાપ્રધાને મુખ્યમંત્રીઓને અપીલ કરી હતી કે તેઓ પોતાના રાજ્યમાં જનતા વચ્ચે જઈને વિશ્વાસ અપાવે કે દેશનો ઉર્જા પુરવઠો સંપૂર્ણપણે સુરક્ષિત છે. પીએમએ આ પરિસ્થિતિની તુલના કોવિડ-19 મહામારી સાથે કરતા કહ્યું કે, આપણે સૌએ એક થઈને આ વૈશ્વિક કટોકટીનો સામનો કરવાનો છે.

વ્યૂહાત્મક દ્રષ્ટિએ પીએમ મોદીએ આંતરિક સુરક્ષા અંગે ગંભીર ચેતવણી આપી હતી. તેમણે જણાવ્યું કે યુદ્ધ જેવી પરિસ્થિતિનો લાભ લઈને કેટલાક અસામાજિક તત્વો દેશની શાંતિ ડહોળવાનો પ્રયાસ કરી શકે છે. આથી, દરિયાકાંઠાની સુરક્ષા, સરહદી વિસ્તારો, સાયબર સ્પેસ અને મહત્વના વ્યૂહાત્મક સ્થાપનો પર સુરક્ષા એજન્સીઓને 'હાઈ એલર્ટ' પર રાખવામાં આવી છે. સરકારનું માનવું છે કે પશ્ચિમ એશિયાનું આ સંકટ લાંબુ ખેંચાઈ શકે છે, તેથી રાજ્યો અને કેન્દ્ર વચ્ચે 'ટીમ ઈન્ડિયા'ની જેમ સંકલન હોવું અત્યંત અનિવાર્ય છે જેથી દેશના અર્થતંત્ર અને સામાન્ય જનતાના જીવન પર તેની ન્યૂનતમ અસર થાય.