મધ્ય પૂર્વમાં ચાલી રહેલું ભીષણ યુદ્ધ હવે પરમાણુ મથકો સુધી પહોંચી ગયું છે, જેણે સમગ્ર વિશ્વમાં ત્રીજા વિશ્વયુદ્ધની દહેશત ઊભી કરી દીધી છે. આંતરરાષ્ટ્રીય મીડિયાના તાજા અહેવાલો મુજબ, ઇઝરાયેલની વાયુસેનાએ ઈરાનના અત્યંત મહત્વના 'અર્દકાન યલોકેક ન્યુક્લિયર ફેસિલિટી' પર સીધો અને ઘાતક હવાઈ હુમલો કર્યો છે. આ હુમલાએ ઈરાનના પરમાણુ શસ્ત્ર કાર્યક્રમને મોટો ફટકો આપ્યો હોવાનું માનવામાં આવે છે.
પ્રાપ્ત પ્રાથમિક માહિતી અનુસાર, ઇઝરાયેલી લડાકુ વિમાનોએ કરેલા આ ભીષણ બોમ્બમારામાં અર્દકાન સ્થિત હેવી વોટર રિએક્ટર પણ સંપૂર્ણપણે ઉડી ગયું છે. યલોકેક (યુરેનિયમ કોન્સન્ટ્રેટ) પરમાણુ ઉર્જા અને શસ્ત્રો બનાવવા માટેનો અત્યંત મહત્વનો કાચો માલ ગણાય છે. આ ફેસિલિટીનો નાશ થવાથી ઈરાનની ન્યુક્લિયર સપ્લાય ચેઇન ખોરવાઈ ગઈ છે.
હાલમાં આ હુમલામાં થયેલા સત્તાવાર નુકસાન અંગે ઈરાન કે ઇઝરાયેલ તરફથી વધુ વિગતોની પ્રતીક્ષા કરવામાં આવી રહી છે. જોકે, નિષ્ણાતોનું માનવું છે કે ઈઝરાયેલ દ્વારા ઈરાનના સીધા પરમાણુ કાર્યક્રમ પર કરાયેલો આ પ્રહાર આગામી દિવસોમાં યુદ્ધને એક નવા અને અત્યંત ખતરનાક વળાંક પર લઈ જશે, જેના વૈશ્વિક પ્રત્યાઘાતો જોવા મળશે.