પટણા:બિહારની રાજધાની પટણામાં પોલીસે નશાના સોદાગરો વિરુદ્ધ અત્યાર સુધીની રૂ.સૌથી મોટી સર્જિકલ સ્ટ્રાઈક કરી છે. આલમગંજ પોલીસ સ્ટેશન વિસ્તારમાં દરોડા પાડીને પોલીસે આંતરરાષ્ટ્રીય બજારમાં રૂ.25 કરોડની કિંમત ધરાવતું આશરે 21 કિલો 'બ્રાઉન સુગર' (સ્મેક) જપ્ત કર્યું છે. આ કાર્યવાહી દરમિયાન પોલીસને ડ્રગ્સ બનાવવાની એક મિની ફેક્ટરી મળી આવી છે, જ્યાં મોટા પાયે નશાકારક પદાર્થોનું ઉત્પાદન અને પેકિંગ કરવામાં આવતું હતું. પટણાના એસએસપી કાર્તિકેય શર્માએ શનિવારે પત્રકાર પરિષદમાં આ ઐતિહાસિક સફળતાની વિગતો જાહેર કરતા જણાવ્યું હતું કે, આ રેકેટ પાછળ એક અત્યંત સંગઠિત સિન્ડિકેટ કામ કરી રહી હતી.આ સમગ્ર ઓપરેશનમાં સૌથી ચોંકાવનારો વળાંક ત્યારે આવ્યો જ્યારે તપાસમાં બિહાર પોલીસના જ એક કોન્સ્ટેબલનું નામ મુખ્ય સૂત્રધાર તરીકે બહાર આવ્યું. કાયદાના રક્ષક ગણાતા પોલીસ કર્મચારીની સંડોવણીથી પોલીસ વિભાગમાં ભારે ફાટફૂટ જોવા મળી રહી છે. એસએસપીએ પુષ્ટિ કરી છે કે આ કોન્સ્ટેબલ ડ્રગ માફિયાઓને સુરક્ષા પૂરી પાડવા અને માહિતી લીક કરવામાં મહત્વની ભૂમિકા ભજવતો હતો. હાલમાં આ ભ્રષ્ટ કોન્સ્ટેબલ ફરાર છે, પરંતુ તેની ધરપકડ માટે પોલીસે ચક્રગતિમાન કર્યા છે.
આ કિસ્સાએ સાબિત કર્યું છે કે નશાના કાળા કારોબારના મૂળ તંત્રની અંદર સુધી ફેલાયેલા છે.પોલીસે જ્યારે ફેક્ટરીમાં દરોડો પાડ્યો ત્યારે ત્યાંનું દ્રશ્ય જોઈને અધિકારીઓ પણ દંગ રહી ગયા હતા. ડ્રગ્સ બનાવવા માટેનો 20 કિલો કાચો માલ, અત્યાધુનિક સાધનો અને હાઈ-ક્વોલિટી સ્મેક ઉપરાંત ઘટનાસ્થળેથી બે ગેરકાયદેસર હથિયારો અને જીવંત કારતૂસ પણ મળી આવ્યા છે. આ ઉપરાંત પોલીસને ત્યાંથી કેટલાક કોરા અને સહી કરેલા ચેક મળ્યા છે, જે દર્શાવે છે કે કરોડો રૂપિયાના વ્યવહારો આ ગેરકાયદે ફેક્ટરીમાંથી થતા હતા. આ કેસમાં અત્યાર સુધી બે રીઢા ગુનેગારોની ધરપકડ કરવામાં આવી છે, જેમના નેટવર્ક છેક આંતરરાષ્ટ્રીય સરહદ સુધી જોડાયેલા હોવાની આશંકા છે.પટણા પોલીસ હવે આ કેસમાં 'બેકવર્ડ અને ફોરવર્ડ લિંકેજ' તપાસી રહી છે, એટલે કે આ ડ્રગ્સ ક્યાંથી આવતું હતું અને ક્યાં સપ્લાય કરવામાં આવતું હતું તેની કડીઓ મેળવવામાં આવી રહી છે.
એસએસપી કાર્તિકેય શર્માએ કડક શબ્દોમાં ચેતવણી આપી છે કે નશાના વેપારમાં સામેલ કોઈ પણ વ્યક્તિ, પછી તે પોલીસ અધિકારી હોય કે રાજકારણી, તેને બક્ષવામાં આવશે નહીં. આગામી દિવસોમાં આ કેસમાં વધુ મોટા ખુલાસા અને ધરપકડ થવાની શક્યતા છે. પટણા પોલીસે શહેરને ડ્રગ્સ મુક્ત બનાવવા માટે હવે સપ્લાયર્સથી લઈને ગ્રાહકો સુધીના આખા નેટવર્ક પર રડાર ગોઠવી દીધું છે.