ગુવાહાટી: પશ્ચિમ એશિયામાં અમેરિકા, ઈઝરાયેલ અને ઈરાન વચ્ચે છેડાયેલા ભીષણ જંગને કારણે ભારતમાં વ્યાપેલા ભય અને અસ્થિરતાના માહોલ વચ્ચે કેન્દ્રીય ગૃહમંત્રી અમિત શાહે મોટું નિવેદન આપીને દેશવાસીઓની ચિંતા દૂર કરી છે. અસમ વિધાનસભા ચૂંટણીના પ્રચાર અર્થે ગુવાહાટીમાં યોજાયેલા ભવ્ય રોડ શો દરમિયાન જનતાને સંબોધતા અમિત શાહે સ્પષ્ટ કર્યું હતું કે દેશમાં લોકડાઉન લાદવાનો સરકારનો કોઈ જ ઈરાદો નથી. છેલ્લા કેટલાક દિવસોથી સોશિયલ મીડિયા પર કોરોનાકાળ જેવું લોકડાઉન ફરી આવશે તેવી વાતો વહેતી થઈ હતી, જેને ગૃહમંત્રીએ સંપૂર્ણપણે પાયાવિહોણી અફવા ગણાવી છે. તેમણે ભારપૂર્વક જણાવ્યું કે દેશની સ્થિતિ સામાન્ય છે અને સરકાર કોઈપણ વૈશ્વિક પડકારને પહોંચી વળવા માટે સક્ષમ છે.

ઈરાન સંકટને કારણે ભારતમાં પેટ્રોલ અને ડીઝલની અછત સર્જાશે તેવી દહેશત વચ્ચે અમિત શાહે ખાતરી આપી હતી કે દેશમાં ઈંધણ કે રસોઈ ગેસ (LPG) ના પુરવઠામાં કોઈ વિક્ષેપ પડશે નહીં. તેમણે કહ્યું કે પ્રધાનમંત્રી નરેન્દ્ર મોદીના નેતૃત્વમાં સરકારે છેલ્લા ૧૦ વર્ષમાં દેશના વ્યૂહાત્મક તેલ ભંડારને એટલો મજબૂત બનાવ્યો છે કે કોઈપણ કટોકટીમાં પુરવઠો જળવાઈ રહે. ગૃહમંત્રીએ લોકોને અપીલ કરી હતી કે ગભરાટમાં આવીને જરૂરિયાત કરતા વધુ સામાન કે ઈંધણનો સંગ્રહ (પેનિક બાઈંગ) ન કરે. પેટ્રોલિયમ મંત્રી હરદીપ સિંહ પુરી પણ આ બાબતે સતત દેખરેખ રાખી રહ્યા છે અને સમુદ્રી માર્ગો પરની હલચલ છતાં ભારતનું સપ્લાય મેનેજમેન્ટ સંપૂર્ણ સુરક્ષિત હોવાનો દાવો કરવામાં આવ્યો છે.

ગૃહમંત્રીએ વધુમાં ઉમેર્યું કે ભારત સરકાર દરેક આંતરરાષ્ટ્રીય ગતિવિધિ પર ચાંપતી નજર રાખી રહી છે અને દેશની અર્થવ્યવસ્થા કે સામાન્ય જનતાના રોજીંદા જીવન પર આ યુદ્ધની આંચ આવવા દેવામાં આવશે નહીં. પ્રધાનમંત્રીએ તમામ રાજ્યોના મુખ્યમંત્રીઓ સાથે બેઠક કરીને એક ટીમ તરીકે કામ કરવાનો સંદેશ આપ્યો છે, જેથી કોઈ પણ પ્રકારની અફવા બજારમાં ન ફેલાય. પાઇપલાઇન ગેસ (PNG) ના નેટવર્કને પણ ઝડપથી વિસ્તારીને ભવિષ્યની જરૂરિયાતો સુરક્ષિત કરવામાં આવી રહી છે. અમિત શાહના આ મક્કમ નિવેદન બાદ શેરબજાર અને બજારમાં વ્યાપેલી અનિશ્ચિતતામાં ઘટાડો જોવા મળ્યો છે અને જનતામાં વિશ્વાસનો સંચાર થયો છે.