લંડન: પાકિસ્તાનના પૂર્વ વડાપ્રધાન ઇમરાન ખાનના નાના પુત્ર કાસિમ ખાન અત્યાર સુધી લાઇમલાઇટથી દૂર રહીને બ્રિટનમાં પોતાનું જીવન વિતાવી રહ્યા હતા. પરંતુ, 2023માં ઇમરાન ખાનની ધરપકડ બાદ સ્થિતિ બદલાઈ અને શાંત દેખાતો આ યુવાન અચાનક વૈશ્વિક મંચ પર સક્રિય થયો. તાજેતરમાં જીનીવા ખાતે સંયુક્ત રાષ્ટ્ર માનવ અધિકાર પરિષદના 61મા સત્રમાં કાસિમ ખાને આપેલા ભાષણે પાકિસ્તાન સરકારને હચમચાવી દીધી છે. કાસિમે જે રીતે તેના પિતાના સ્વાસ્થ્ય અને પાકિસ્તાનમાં લોકશાહીના પતનને માનવતાવાદી દ્રષ્ટિકોણથી રજૂ કર્યું, તેનાથી પાકિસ્તાનની વર્તમાન સરકાર રક્ષણાત્મક સ્થિતિમાં આવી ગઈ છે અને આ ઘટનાને દેશ વિરુદ્ધનું કાવતરું ગણાવી રહી છે.

 કાસિમ ખાનનો જન્મ 10 એપ્રિલ, 1999ના રોજ થયો હતો અને તેમનો ઉછેર તેમની માતા જેમિમા ગોલ્ડસ્મિથ સાથે લંડનના ચેલ્સિયા વિસ્તારમાં થયો છે. કાસિમ માત્ર એક રાજકીય વારસદાર જ નથી, પણ અત્યંત શિક્ષિત અને બુદ્ધિશાળી યુવાન છે. તેમણે પ્રતિષ્ઠિત બ્રિસ્ટોલ યુનિવર્સિટીમાંથી 'ઇસ્લામિક હિસ્ટ્રી'માં સ્નાતકની ડિગ્રી મેળવી છે. શિક્ષણ પૂર્ણ કર્યા બાદ તેમણે બિઝનેસની દુનિયામાં ઝંપલાવ્યું અને 'MIFU' નામની AI-સંચાલિત માર્કેટિંગ કંપનીના સહ-સ્થાપક બન્યા. આ પ્લેટફોર્મ નાના કન્ટેન્ટ ક્રિએટર્સને મોટી બ્રાન્ડ્સ સાથે જોડે છે, જે કાસિમની આધુનિક ટેકનોલોજી પરની પકડ અને ઉદ્યોગસાહસિક તરીકેની તેમની ક્ષમતા દર્શાવે છે.

 ભલે કાસિમ ખાન વર્ષોથી પાકિસ્તાનથી દૂર લંડનમાં સ્થાયી થયા હોય, પરંતુ તેમના પિતા સાથેનો સંબંધ હંમેશા ગાઢ રહ્યો છે. ઇમરાન ખાન ઘણીવાર સોશિયલ મીડિયા પર તેમના પુત્રો પ્રત્યેનો પ્રેમ વ્યક્ત કરતા રહ્યા છે. જ્યારે કાસિમનો ગ્રેજ્યુએશન સમારોહ હતો, ત્યારે ઇમરાન ખાન રાજકીય વ્યસ્તતા અને સુરક્ષા કારણોસર લંડન જઈ શક્યા ન હતા, જેનો વસવસો તેમણે જાતે વ્યક્ત કર્યો હતો. આજે જ્યારે ઇમરાન ખાન જેલના સળિયા પાછળ છે, ત્યારે કાસિમ તેમની 'ઢાલ' બનીને આંતરરાષ્ટ્રીય સ્તરે અવાજ ઉઠાવી રહ્યા છે. લંડનની ગલીઓમાંથી નીકળીને યુએનના મંચ સુધીની કાસિમની આ સફર પાકિસ્તાનના ભાવિ રાજકારણમાં કોઈ મોટા પરિવર્તનનો સંકેત આપી રહી હોય તેમ લાગે છે.