નવી દિલ્હી:સુપ્રીમ કોર્ટે એક સીમાચિહ્નરૂપ અવલોકન કરતા જણાવ્યું છે કે ટ્રાયલ વિના કોઈ વ્યક્તિને જેલના સળિયા પાછળ રાખવી એ સજા સમાન છે. આ ટિપ્પણી સાથે જસ્ટિસ દીપાંકર દત્તા અને જસ્ટિસ પી.વી. વરાલેની બેન્ચે પંજાબના એક રહેવાસીને જામીન આપવાનો આદેશ કર્યો છે, જે ફેબ્રુઆરી ૨૦૨૪થી હત્યાના પ્રયાસના આરોપમાં જેલમાં બંધ હતો.

ટ્રાયલ શરૂ ન થતા કોર્ટે નારાજગી વ્યક્ત કરી:
સર્વોચ્ચ અદાલતે નોંધ્યું હતું કે આરોપી પ્રદીપ કુમાર ઉર્ફે બાનુ છેલ્લા બે વર્ષથી જેલમાં છે, પરંતુ હજુ સુધી તેની સામેની ટ્રાયલ શરૂ પણ થઈ નથી. પ્રોસિક્યુશન પક્ષે આ કેસમાં કુલ ૨૩ સાક્ષીઓની તપાસ કરવાની દરખાસ્ત મૂકી છે, પરંતુ આશ્ચર્યજનક રીતે અત્યાર સુધી એક પણ સાક્ષીની તપાસ કરવામાં આવી નથી. કોર્ટે તેના ૧૩ માર્ચના આદેશમાં સ્પષ્ટ કર્યું હતું કે ટ્રાયલ પૂર્ણ થવામાં હજુ ઘણો સમય લાગે તેમ છે અને આવી સ્થિતિમાં આરોપીની વધુ અટકાયત જરૂરી જણાતી નથી.

હાઈકોર્ટનો આદેશ રદ કર્યો:
આ અગાઉ ૧૧ જુલાઈ, ૨૦૨૫ના રોજ પંજાબ અને હરિયાણા હાઈકોર્ટે પ્રદીપ કુમારની જામીન અરજી ફગાવી દીધી હતી. સુપ્રીમ કોર્ટે હાઈકોર્ટના આ આદેશને રદ બાતલ ઠેરવ્યો છે. બેન્ચે હાઈલાઈટ કર્યું હતું કે લગભગ બે વર્ષ વીતી જવા છતાં ટ્રાયલ શરૂ થઈ નથી અને તેનો અંત ક્યાંય દેખાતો નથી, જે ન્યાયિક પ્રક્રિયામાં વિલંબ દર્શાવે છે.

જામીન માટે આકરી શરતો લાદી:
અદાલતે જામીન આપવાની સાથે કેટલીક આકરી શરતો પણ લાદી છે. આરોપીએ ટ્રાયલ કોર્ટના સંતોષ મુજબ જામીન બોન્ડ રજૂ કરવા પડશે. કોર્ટે કડક સૂચના આપી છે કે આરોપી પ્રત્યક્ષ કે પરોક્ષ રીતે કેસ સાથે જોડાયેલા કોઈ પણ વ્યક્તિને પ્રલોભન, ધમકી કે વચન આપીને સત્ય છુપાવવા માટે દબાણ કરી શકશે નહીં. જો જામીનની કોઈ પણ શરતનો ભંગ થશે, તો ટ્રાયલ કોર્ટ જામીન રદ કરવા માટે સ્વતંત્ર રહેશે. વધુમાં, આરોપીએ દરેક સુનાવણીમાં હાજર રહેવું પડશે, અન્યથા જામીન રદ થઈ શકે છે.