ઓટ્ટાવા, તા.30: કેનેડા જવાનું સપનું જોતા અને ત્યાં આશ્રય (Asylum) મેળવવા ઈચ્છતા લોકો માટે મોટા સમાચાર સામે આવ્યા છે. કેનેડા સરકારે તેની ઇમિગ્રેશન સિસ્ટમને વધુ સુરક્ષિત અને પારદર્શક બનાવવા માટે 'બિલ C-12' ને મંજૂરી આપી દીધી છે. 26 માર્ચ, 2026 ના રોજ મળેલી શાહી મંજૂરી બાદ હવે કેનેડામાં પ્રવેશવા અને રહેવા માટેના નિયમો પહેલા કરતા ઘણા કઠિન બની ગયા છે.
સમયમર્યાદા ચૂકી ગયા તો આશ્રય નહીં મળે
નવા કાયદા મુજબ, જો કોઈ વ્યક્તિ કેનેડામાં પ્રવેશ્યાના એક વર્ષ પછી આશ્રય માટે દાવો કરે છે, તો તેની અરજીને ઇમિગ્રેશન અને રેફ્યુજી બોર્ડ ઓફ કેનેડા (IRB) પાસે મોકલવામાં આવશે નહીં. એટલે કે, જે લોકો લાંબા સમય સુધી દેશમાં રહ્યા બાદ છેલ્લી ઘડીએ આશ્રય મેળવવાનો પ્રયાસ કરતા હતા, તેમના માટે હવે રસ્તા બંધ થઈ ગયા છે. આ નિયમ તે લોકો માટે પણ લાગુ પડશે જેઓ દેશ છોડીને ફરીથી પ્રવેશ્યા હોય.
સરહદ પર કડક જાપ્તો
કેનેડા અને યુએસની જમીન સરહદ પર સત્તાવાર પ્રવેશ બંદરો સિવાય અન્ય જગ્યાએથી પ્રવેશનારા લોકો માટે પણ નિયમો કડક કરાયા છે. જો કોઈ વ્યક્તિ અનિયમિત રીતે પ્રવેશ્યાના 14 દિવસ ની અંદર દાવો નહીં કરે, તો તેને સીધો યુનાઇટેડ સ્ટેટ્સ પરત મોકલી દેવામાં આવશે. સરકારનો હેતુ આશ્રય પ્રણાલીના થઈ રહેલા દુરુપયોગને અટકાવવાનો અને સિસ્ટમ પરનું દબાણ ઘટાડવાનો છે.
સરકારના હાથમાં આવી 'માસ્ટર કી'
નવા કાયદાની સૌથી મોટી વિશેષતા એ છે કે હવે કેનેડા સરકાર પાસે જાહેર હિતમાં કોઈપણ વિઝા અથવા પરમિટને રદ કરવાની, સસ્પેન્ડ કરવાની કે બદલવાની વિશેષ સત્તા છે. આ ઉપરાંત, ફેડરલ અને પ્રાંતીય સ્તરે માહિતી શેર કરવાની પ્રક્રિયાને પણ વધુ વેગ આપવામાં આવ્યો છે, જેથી ઇમિગ્રેશન સંબંધિત છેતરપિંડીઓને તુરંત પકડી શકાય.
ઝડપી પ્રક્રિયા અને પારદર્શિતા
હવેથી આશ્રય માટેની અરજીઓ ઓનલાઈન અને વધુ સરળ બનાવવામાં આવશે, પરંતુ તે માત્ર ત્યારે જ પ્રોસેસ થશે જ્યારે અરજદાર કેનેડામાં શારીરિક રીતે હાજર હોય. જો કોઈ વ્યક્તિ નિર્ણય આવે તે પહેલા સ્વેચ્છાએ વતન પરત ફરે, તો તેનો દાવો આપોઆપ રદ ગણાશે. જોકે, માનવીય અભિગમ રાખતા સરકારે સ્પષ્ટ કર્યું છે કે સગીરો અને સંવેદનશીલ વ્યક્તિઓને સુરક્ષા અને કાયદાકીય સહાય આપવામાં આવશે.