ઓકલેન્ડ, તા.30: ન્યુઝીલેન્ડની શાંતિપ્રિય ધરતી પર કાયમી વસવાટ કરવા અને ત્યાંના નાગરિક બનવા ઈચ્છતા લોકો માટે એક ખુશખબર છે. ન્યુઝીલેન્ડ સરકાર દ્વારા નાગરિકતા મેળવવાની પ્રક્રિયાને વધુ સ્પષ્ટ અને પારદર્શક બનાવતી એક વિગતવાર માર્ગદર્શિકા બહાર પાડવામાં આવી છે. જો તમે પણ ન્યુઝીલેન્ડના સત્તાવાર નાગરિક બનવા માંગો છો, તો આ સ્ટેપ-બાય-સ્ટેપ ગાઇડ તમારા માટે ખૂબ જ ઉપયોગી સાબિત થશે.
તમારી પાત્રતા (Eligibility) તપાસો
ન્યુઝીલેન્ડ ત્રણ પ્રકારે નાગરિકતા આપે છે: ૧. જન્મ દ્વારા, ૨. વંશ દ્વારા (જો માતા-પિતા નાગરિક હોય) અને ૩. ગ્રાન્ટ દ્વારા (વિદેશી નાગરિકો માટે). અરજી કરતા પહેલા સરકારી વેબસાઇટ પરના 'સેલ્ફ-ચેક ટૂલ'નો ઉપયોગ કરીને તમે લાયક છો કે નહીં તેની ખાતરી કરી લેવી હિતાવહ છે.
દસ્તાવેજો અને અરજીનો ખર્ચ
નાગરિકતા માટે તમારી ઓળખના પુરાવા જેવા કે જન્મનું પ્રમાણપત્ર અને માન્ય પાસપોર્ટ હોવો અનિવાર્ય છે. આ પ્રક્રિયા માટે ૧૬ વર્ષથી વધુ ઉંમરના વ્યક્તિએ $560 (આશરે ₹29,000) અને બાળકો માટે $280 (આશરે ₹14,500) ફી ચૂકવવી પડે છે. અરજી ઓનલાઇન, પોસ્ટ દ્વારા અથવા રૂબરૂ પણ આપી શકાય છે.
ધીરજની કસોટી: મંજૂરીમાં લાગશે સમય
એકવાર અરજી સબમિટ થઈ જાય પછી તેની તપાસમાં ૩ થી ૧૪ મહિના જેટલો સમય લાગી શકે છે. અરજદારો તેમના 'RealMe' એકાઉન્ટ દ્વારા પોતાની અરજીનું સ્ટેટસ ઓનલાઇન ટ્રેક કરી શકે છે. આ ગાળામાં કોઈ ભૂલ ન થાય તે માટે સૂચનાઓનું કડક પાલન કરવું જરૂરી છે.
નાગરિકતા સમારોહ અને નવો પાસપોર્ટ
અરજી મંજૂર થયા પછી, સૌથી રોમાંચક તબક્કો 'નાગરિકતા સમારોહ' (Citizenship Ceremony) છે. આ એક ઔપચારિક કાર્યક્રમ છે જ્યાં શપથ લીધા બાદ તમે સત્તાવાર રીતે ન્યુઝીલેન્ડના નાગરિક જાહેર થાઓ છો. નાગરિક બન્યા બાદ તમે ન્યુઝીલેન્ડના પાસપોર્ટ માટે અલગથી અરજી કરી શકો છો, જે તમને વિશ્વભરમાં ટ્રાવેલ કરવાની આઝાદી આપે છે.