સ્ટેટ કોલેજ (USA) : ગુજરાતના હીરાનગરી સુરતના વતની અને પ્રતિભાશાળી વિદ્યાર્થી ઓમ ડોબરિયાએ સાત સમુદ્ર પાર અમેરિકાની ધરતી પર ગુજરાતનું નામ રોશન કર્યું છે. પેન સ્ટેટ યુનિવર્સિટીએ ઓમ ડોબરિયાને યુનિવર્સિટી કેમ્પસમાં આંતરરાષ્ટ્રીય વિદ્યાર્થીઓ માટે સમાવેશી અને મૈત્રીપૂર્ણ વાતાવરણ બનાવવાના તેમના ઉમદા પ્રયાસો બદલ '2026 જોન ડબલ્યુ. ઓસ્વાલ્ડ એવોર્ડ' એનાયત કરી વિશેષ સન્માન આપ્યું છે.
સુરતથી અમેરિકા સુધીની તેજસ્વી સફર
ઓમ ડોબરિયા પેન સ્ટેટ ખાતેની પ્રખ્યાત 'સ્મીલ કોલેજ ઓફ બિઝનેસ'માં બિઝનેસ એનાલિટિક્સ અને ઇન્ફર્મેશન સિસ્ટમ્સનો અભ્યાસ કરી રહ્યો છે. અભ્યાસની સાથે સાથે ઓમમાં ટેકનોલોજી અને સમાજ વચ્ચેના અંતરને દૂર કરવાનો અનોખો જુસ્સો છે. તે યુનિવર્સિટીમાં 'રેસિડેન્ટ આસિસ્ટન્ટ' તરીકે પણ ફરજ બજાવે છે, જ્યાં તેણે અન્ય દેશોમાંથી આવતા વિદ્યાર્થીઓને કેમ્પસમાં એડજસ્ટ થવામાં અને એકતા જાળવવામાં મહત્વની ભૂમિકા ભજવી છે.
શું છે ઓસ્વાલ્ડ એવોર્ડનું મહત્ત્વ?
જોન ડબલ્યુ. ઓસ્વાલ્ડ એવોર્ડ એવા વિદ્યાર્થીઓને આપવામાં આવે છે જેઓ યુનિવર્સિટીમાં નેતૃત્વ, શૈક્ષણિક પ્રવૃત્તિઓ અને સામુદાયિક સેવામાં અસાધારણ યોગદાન આપે છે. ઓમ ડોબરિયાએ ખાસ કરીને આંતરરાષ્ટ્રીય ડાયસ્પોરાના વિદ્યાર્થીઓ માટે એક એવું પ્લેટફોર્મ પૂરું પાડ્યું જ્યાં દરેકને સમાન ગણવામાં આવે. તેની આ 'ઇન્ક્લુઝિવિટી' (સમાવેશીતા) ની ભાવનાને કારણે જ યુનિવર્સિટી પ્રશાસને તેની પસંદગી કરી છે.
ભવિષ્યનું વિઝન
ઓમ માને છે કે માત્ર ટેકનોલોજી પૂરતી નથી, પરંતુ તેનો ઉપયોગ વ્યાપાર અને સમાજની સુધારણા માટે થવો જોઈએ. બિઝનેસ એનાલિટિક્સમાં માસ્ટરી મેળવી રહેલો ઓમ ભવિષ્યમાં ટેક-વર્લ્ડમાં મોટા બદલાવ લાવવા માંગે છે. તેના માતા-પિતા અને સુરત સ્થિત સ્નેહીજનોમાં આ સમાચારથી ખુશીની લહેર દોડી ગઈ છે. અમેરિકાના પ્રતિષ્ઠિત અખબારો અને ન્યૂઝ પોર્ટલે પણ આ ભારતીય વિદ્યાર્થીની સિદ્ધિની નોંધ લીધી છે.