નવી દિલ્હી : દિલ્હી પોલીસની સ્પેશિયલ સેલે એક અત્યંત મહત્વની સફળતા મેળવતા લશ્કર-એ-તૈયબાના કથિત 'પોસ્ટર બોય' અને ખૂંખાર આતંકવાદી શબ્બીર લોનની ધરપકડ કરી છે. દિલ્હી મેટ્રોમાં વિવાદાસ્પદ પોસ્ટર લગાવવાના કેસમાં મુખ્ય સૂત્રધાર ગણાતો શબ્બીર છેલ્લા સાત વર્ષથી સુરક્ષા એજન્સીઓની આંખમાં ધૂળ નાખીને ફરતો હતો. પોલીસના જણાવ્યા અનુસાર, તે બાંગ્લાદેશમાં રહીને ભારતમાં આતંકી પ્રવૃત્તિઓનું સંચાલન કરી રહ્યો હતો.
શાલ વેચનાર ફેરિયાનો વેશ અને અનેક ઓળખ
તપાસમાં બહાર આવ્યું છે કે શબ્બીર લોન અત્યંત શાતિર ગુનેગાર છે. પોતાની સાચી ઓળખ છુપાવવા માટે તે ક્યારેક 'રાજુ' તો ક્યારેક 'ઝફર સિદ્દીકી' બની જતો હતો. તે દિલ્હી, હિમાચલ પ્રદેશ, કોલકાતા, ગોવા અને કેરળ જેવા અનેક રાજ્યોમાં 'કાશ્મીરી શાલ' વેચવાના બહાને ફરતો હતો. વાસ્તવમાં, શાલ વેચવાની આ આડમાં તે સ્થાનિક સ્તરે આતંકી નેટવર્ક ઊભું કરતો હતો અને સંવેદનશીલ સ્થળોની રેકી કરતો હતો.
પાકિસ્તાનમાં લીધી હતી તાલીમ, ૧૨ વર્ષ જેલમાં રહ્યો
શબ્બીર લોન કોઈ સાધારણ ગુનેગાર નથી, તેણે પાકિસ્તાનમાં આવેલા આતંકી કેમ્પોમાં હથિયારો ચલાવવાની સઘન તાલીમ લીધી છે. વર્ષ ૨૦૦૭માં જ્યારે તે દિલ્હીમાં એક મોટા હુમલાનું કાવતરું ઘડી રહ્યો હતો, ત્યારે હથિયારોના મોટા જથ્થા સાથે તેની ધરપકડ કરવામાં આવી હતી. આ ગુનામાં તે ૧૨ વર્ષ સુધી જેલના સળિયા પાછળ રહ્યો હતો. વર્ષ ૨૦૧૯માં જેલમાંથી છૂટ્યા બાદ તે તક જોઈને બાંગ્લાદેશ ભાગી ગયો હતો અને ત્યાંથી ફરી ભારત વિરોધી પ્રવૃત્તિઓ શરૂ કરી હતી.
સુરક્ષા એજન્સીઓ માટે મોટી જીત
દિલ્હી મેટ્રો પોસ્ટર કેસમાં તેનું નામ સામે આવ્યા બાદ પોલીસ સતત તેની પાછળ હતી. આતંકી નેટવર્ક તોડવા માટે આ ધરપકડ ખૂબ જ મહત્વની માનવામાં આવે છે. હાલમાં પોલીસ તેની પૂછપરછ કરી રહી છે કે બાંગ્લાદેશમાં તેને કોણ મદદ કરી રહ્યું હતું અને ભારતમાં તેના સ્લીપર સેલ ક્યાં ક્યાં ફેલાયેલા છે. આ ધરપકડથી આગામી સમયમાં થનારા અનેક મોટા હુમલા ટળી ગયા હોવાનું મનાય છે.