કોલકાતા : પશ્ચિમ બંગાળમાં ચૂંટણીના પડઘમ વાગી રહ્યા છે ત્યારે રાજકીય લડાઈ હવે મેદાન પરથી સીધી ચૂંટણી પંચના આંગણે પહોંચી છે. ભારતીય જનતા પાર્ટીએ સોમવારે ચૂંટણી પંચ સમક્ષ પશ્ચિમ બંગાળના મુખ્યમંત્રી મમતા બેનર્જી સામે ગંભીર આક્ષેપો સાથેની ફરિયાદ દાખલ કરી છે. ભાજપે માંગ કરી છે કે આદર્શ આચાર સંહિતાના ઉલ્લંઘન બદલ મમતા બેનર્જીને ચૂંટણી પ્રચાર કરવા પર તાત્કાલિક પ્રતિબંધ મૂકવામાં આવે અને તેમની સામે કાનૂની કાર્યવાહી શરૂ કરવામાં આવે.
ઉશ્કેરણી અને ધાકધમકીના ગંભીર આરોપો
કેન્દ્રીય મંત્રીઓ પીયૂષ ગોયલ, કિરેન રિજિજુ અને સુકાંત મજુમદાર સહિતના ઉચ્ચ સ્તરીય પ્રતિનિધિમંડળે પોતાની ફરિયાદમાં જણાવ્યું છે કે, મમતા બેનર્જી તેમની જાહેર રેલીઓમાં સતત ઉશ્કેરણીજનક નિવેદનો આપી રહ્યા છે. ભાજપનો આરોપ છે કે ૨૫ માર્ચે મૈનાગુડીની રેલીમાં મમતાએ ધમકીભર્યા સૂરે કહ્યું હતું કે, "મતદાન પત્યા પછી નાગરિકોએ તેમના ઘરની બહાર 'હું ભાજપને ટેકો આપતી નથી' તેવા પોસ્ટરો લગાવવા પડશે." આ ઉપરાંત, મહિલાઓને 'તમારી પાસે જે કંઈ હોય તે લઈને બહાર આવવા' કહીને હિંસા માટે ઉકસાવવામાં આવી રહ્યા હોવાનો પણ દાવો કરાયો છે.
ચૂંટણી પ્રક્રિયાની વિશ્વસનીયતા પર પ્રહાર
ભાજપે ફરિયાદમાં વધુમાં જણાવ્યું છે કે, મમતા બેનર્જી મતગણતરી પ્રક્રિયા પર શંકા વ્યક્ત કરીને લોકોનો લોકશાહી અને ચૂંટણી પંચ પરથી વિશ્વાસ ઉઠાવવાનું કામ કરી રહ્યા છે. દક્ષિણ ૨૪ પરગણા જિલ્લાના બસંતીમાં ભાજપના કાર્યકરો પર થયેલા હુમલાનો ઉલ્લેખ કરતા પાર્ટીએ આક્ષેપ કર્યો કે, તૃણમૂલ કોંગ્રેસના ગુંડાઓ દ્વારા આ હિંસા આચરવામાં આવી હતી અને રાજ્ય પોલીસ માત્ર 'તમાશો' જોતી રહી હતી. ભાજપે ટીએમસી સાંસદ મહુઆ મોઇત્રા પર પણ ભાષાકીય જૂથો વચ્ચે વૈમનસ્ય ફેલાવવાનો આરોપ મૂક્યો છે.
કેન્દ્રીય દળોની વધુ તૈનાતીની માંગ
બંગાળમાં મુક્ત અને ન્યાયી ચૂંટણી સુનિશ્ચિત કરવા માટે ભાજપે ચૂંટણી પંચને વિનંતી કરી છે કે સંવેદનશીલ વિસ્તારોમાં કેન્દ્રીય સુરક્ષા દળોની વધુ કંપનીઓ તૈનાત કરવામાં આવે. સાથે જ, ચૂંટણી નિરીક્ષક તરીકે વધુ પ્રમાણમાં IAS અને IPS અધિકારીઓને મેદાનમાં ઉતારવાની પણ માંગ કરવામાં આવી છે. પશ્ચિમ બંગાળમાં ૨૩ એપ્રિલ અને ૨૯ એપ્રિલના રોજ બે તબક્કામાં મતદાન થવાનું છે, જેના પરિણામો ૪ મેના રોજ જાહેર થશે. હવે જોવાનું એ રહેશે કે ચૂંટણી પંચ ભાજપની આ આક્રમક ફરિયાદ પર શું પગલાં લે છે.