વોશિંગ્ટન: અમેરિકાના પ્રથમ ભારતીય મૂળના સેકન્ડ લેડી ઉષા વેન્સે તાજેતરમાં એક ઈન્ટરવ્યુમાં તેમના અંગત જીવન અને ઉપરાષ્ટ્રપતિ જે.ડી. વેન્સ સાથેના સંબંધો અંગે અનેક ખુલાસા કર્યા છે. તેમણે સ્પષ્ટપણે જણાવ્યું હતું કે તેઓ પોતાના પતિ સાથે દરેક મુદ્દે સહમત નથી હોતા, પરંતુ આ વૈચારિક મતભેદ તેમના સંબંધોમાં 'ઓપન માઇન્ડેડ' એટલે કે ખુલ્લા મનથી થતી વાતચીત માટે જગ્યા પૂરી પાડે છે.

વ્યાવસાયિક નહીં પણ અંગત સલાહકારની ભૂમિકા:
ઉષા વેન્સે એનબીસી ન્યૂઝને આપેલા ઈન્ટરવ્યુમાં જણાવ્યું હતું કે જે.ડી. વેન્સ પાસે નીતિ વિષયક સલાહકારોની આખી ટીમ છે, પરંતુ જ્યારે કોઈ બાબત તેમને અંગત રીતે પરેશાન કરતી હોય અથવા જે વિષય તેમના માટે વ્યક્તિગત રીતે મહત્વનો હોય ત્યારે તેઓ ઉષા વેન્સ પાસે આવે છે. તેમણે ઉમેર્યું હતું કે, "હું તેમની કોઈ સ્ટાફ મેમ્બર નથી અને વ્યવસાયિક રીતે આમાં સામેલ નથી. એક પત્ની તરીકે હું તેમના વિશ્વમાં શું ચાલી રહ્યું છે અને તેમની ચિંતાઓ શું છે તે સમજવા માંગુ છું જેથી હું તેમને યોગ્ય ટેકો આપી શકું."

વૈચારિક મતભેદ છતાં રચનાત્મક સંવાદ:
દંપતી વચ્ચેના મતભેદો વિશે વાત કરતા તેમણે કહ્યું હતું કે અમારી વચ્ચે સતત સંવાદ થતો રહે છે. એવી કોઈ અપેક્ષા નથી કે અમે દરેક બાબતમાં એકસરખું જ વિચારીએ. મહત્વની બાબત એ છે કે અમે એકબીજાના દ્રષ્ટિકોણને સાંભળીએ છીએ. એક એવી વ્યક્તિ તરીકે જે તેમને પ્રેમ કરે છે અને તેમની સફળતા ઈચ્છે છે, હું તેમને અર્થપૂર્ણ ઇનપુટ આપું છું. ભલે અમે સહમત ન હોઈએ, પણ અમારી ચર્ચાઓ હંમેશા ઉત્પાદક અને હકારાત્મક હોય છે.

2028ની રાષ્ટ્રપતિની ચૂંટણી પર ધ્યાન નથી:
આગામી રાજકીય વ્યૂહરચના અંગે સ્પષ્ટતા કરતા ઉષા વેન્સે કહ્યું હતું કે હાલમાં તેમના ઘરમાં 2028ની રાષ્ટ્રપતિ પદની ચૂંટણી અંગે કોઈ ચર્ચા પ્રાથમિકતામાં નથી. જે.ડી. વેન્સ અત્યારે નવેમ્બરમાં યોજાનારી મધ્યવર્તી (મિડ-ટર્મ) ચૂંટણીઓ પર સંપૂર્ણ ધ્યાન કેન્દ્રિત કરી રહ્યા છે. તેમણે વધુમાં જણાવ્યું હતું કે સંભવિત રાષ્ટ્રપતિ પદના પ્રચાર અંગેનો સ્પષ્ટ ખ્યાલ વર્ષ 2027માં આવશે, અત્યારે આ ક્ષણના કાર્યો અને જવાબદારીઓ વધુ મહત્વની છે.