વોશિંગ્ટન: તા.૧ અમેરિકાના ઇમિગ્રેશન કાયદાના ઇતિહાસમાં બુધવારનો દિવસ અત્યંત નિર્ણાયક સાબિત થવા જઈ રહ્યો છે. યુએસ પ્રમુખ ડોનાલ્ડ ટ્રમ્પ 'જન્મ અધિકાર નાગરિકતા' (Birthright Citizenship) પર પ્રતિબંધ મૂકવાના તેમના વિવાદાસ્પદ નિર્ણયના બચાવ માટે રૂબરૂમાં સુપ્રીમ કોર્ટમાં હાજર રહેશે. વ્હાઇટ હાઉસના જણાવ્યા અનુસાર, ટ્રમ્પ સવારે ૧૦ વાગ્યે મૌખિક દલીલો સાંભળવા માટે કોર્ટમાં ઉપસ્થિત રહેશે, જે કદાચ કોઈ રાષ્ટ્રપતિ માટે અસામાન્ય ઘટના છે.
શું છે સમગ્ર વિવાદ?
જાન્યુઆરી ૨૦૨૫માં સત્તા સંભાળતાની સાથે જ ટ્રમ્પે એક એક્ઝિક્યુટિવ ઓર્ડર જારી કર્યો હતો. આ આદેશ મુજબ, જો અમેરિકામાં જન્મેલા બાળકના માતા-પિતામાંથી કોઈ પણ અમેરિકન નાગરિક અથવા ગ્રીન કાર્ડ ધારક (કાયદેસર નિવાસી) ન હોય, તો તે બાળકને આપોઆપ અમેરિકાની નાગરિકતા મળશે નહીં. ટ્રમ્પના આ આદેશને નીચલી અદાલતે બંધારણના ૧૪મા સુધારાનું ઉલ્લંઘન ગણાવીને અટકાવી દીધો હતો, જેને હવે સુપ્રીમ કોર્ટમાં પડકારવામાં આવ્યો છે.
બંધારણનો ૧૪મો સુધારો અને ટ્રમ્પનો તર્ક
અમેરિકામાં ૧૯મી સદીથી એવી પરંપરા છે કે અમેરિકાની ધરતી પર જન્મેલા કોઈપણ વ્યક્તિને આપોઆપ ત્યાંની નાગરિકતા મળે છે. જોકે, ટ્રમ્પનું માનવું છે કે આ કાયદાનો ગેરકાયદેસર ઇમિગ્રન્ટ્સ દ્વારા દુરુપયોગ કરવામાં આવે છે. ટ્રમ્પે જણાવ્યું છે કે, "સ્થાનિક સુરક્ષા વધારવા અને ગેરકાયદેસર ઇમિગ્રેશનને જડમૂળથી ઉખેડવા માટે આ કડક પગલું જરૂરી છે." મંગળવારે ન્યાયાધીશો વિશે ટિપ્પણી કરતા તેમણે કહ્યું હતું કે તેમને કેટલાક ન્યાયાધીશો પસંદ છે, જ્યારે પૂર્વ પ્રમુખો દ્વારા નિમાયેલા ન્યાયાધીશો સામે તેમણે અણગમો વ્યક્ત કર્યો હતો.
અધિકાર જૂથોમાં રોષ અને અનિશ્ચિતતા
બીજી તરફ, માનવ અધિકાર સંગઠનો અને લઘુમતી સમુદાયો આ પગલાનો સખત વિરોધ કરી રહ્યા છે. તેમનું કહેવું છે કે આ નિર્ણયથી લાખો પરિવારો અને બાળકોનું ભવિષ્ય જોખમમાં મુકાશે અને દેશમાં ભયનું વાતાવરણ ઉભું થશે. ખાસ કરીને ભારતીય અને અન્ય એશિયન મૂળના લોકો જેઓ ત્યાં કામચલાઉ વિઝા પર છે, તેમના માટે પણ આ ચિંતાનો વિષય બન્યો છે.
સુપ્રીમ કોર્ટનો આ ચુકાદો માત્ર નાગરિકતા જ નહીં, પરંતુ અમેરિકાની લોકશાહી અને બંધારણીય અર્થઘટનની દિશા પણ નક્કી કરશે.