વોશિંગ્ટન: તા.૧ અમેરિકામાં સ્થાયી થઈને કામ કરવા ઈચ્છતા હજારો ભારતીય ટેકનિકલ નિષ્ણાતો માટે આજનો દિવસ અત્યંત નિર્ણાયક છે. યુએસ સિટિઝનશિપ એન્ડ ઇમિગ્રેશન સર્વિસીસ (USCIS) એ સત્તાવાર જાહેરાત કરી છે કે નાણાકીય વર્ષ 2027 માટે H-1B વિઝા કેપ હેઠળની અરજીઓ સ્વીકારવાની પ્રક્રિયા આજથી એટલે કે ૧ એપ્રિલ, ૨૦૨૬ થી શરૂ થઈ ગઈ છે. આ વર્ષે પ્રક્રિયામાં મોટા ફેરફારો અને વધારાના આર્થિક બોજને કારણે અરજદારો અને કંપનીઓ બંનેની કસોટી થવાની છે.
પસંદ થયેલા ઉમેદવારો માટે 90 દિવસની વિન્ડો
USCIS એ પુષ્ટિ કરી છે કે ૮૫,૦૦૦ વિઝાના વાર્ષિક ક્વોટા માટે પૂરતી નોંધણીઓ મળી ગઈ છે અને લોટરીમાં જેમના નામ આવ્યા છે તેમને જાણ કરી દેવામાં આવી છે. પસંદ થયેલા લાભાર્થીઓ માટે આજથી ઓછામાં ઓછા ૯૦ દિવસ સુધી ફાઇલિંગ વિન્ડો ખુલ્લી રહેશે. અરજદારોએ તેમના ઓનલાઇન એકાઉન્ટ દ્વારા સ્ટેટસ ચેક કરવાનું રહેશે અને અરજી સાથે પસંદગી સૂચનાની નકલ જોડવી ફરજિયાત છે.
નવું વેતન મોડેલ અને મોંઘી ફી
આ વર્ષની સૌથી મોટી વિશેષતા 'ભારિત પસંદગી પ્રણાલી' (Weighted Selection System) છે. આ નવી સિસ્ટમ હેઠળ, ઉચ્ચ કૌશલ્ય અને વધુ પગાર ધરાવતા અરજદારોને પ્રાથમિકતા આપવામાં આવી છે. આ ઉપરાંત, સપ્ટેમ્બર ૨૦૨૫ પછી દાખલ કરાયેલી કેટલીક અરજીઓ માટે $૧૦૦,૦૦૦ (અંદાજે ૮૩ લાખ રૂપિયા) ની વધારાની ફી ચૂકવવાની શરત પણ રાખવામાં આવી છે, જે કંપનીઓ માટે મોટો આર્થિક ફટકો છે.
દસ્તાવેજોમાં સહેજ પણ ભૂલ નહીં ચાલે
એજન્સીએ સ્પષ્ટ કર્યું છે કે આજથી માત્ર ફોર્મ I-129 ની નવી આવૃત્તિ (તારીખ 02/27/26) જ સ્વીકારવામાં આવશે. નોંધણી સમયે જે પાસપોર્ટ કે ઓળખના પુરાવા આપ્યા હતા, તે જ અરજી સમયે રજૂ કરવાના રહેશે. જો દસ્તાવેજોમાં વિસંગતતા જણાશે તો અરજી રદ થઈ શકે છે. યાદ રહે કે લોટરીમાં પસંદગી થવી એ વિઝા મળવાની ગેરંટી નથી; યોગ્ય પુરાવા રજૂ કર્યા પછી જ અંતિમ મંજૂરી મળશે.
ભારતીયોનો દબદબો અને ક્વોટાની વિગત
H-1B વિઝા મેળવનારાઓમાં દર વર્ષે ભારતીયોનો હિસ્સો સૌથી મોટો હોય છે. કુલ ૮૫,૦૦૦ વિઝામાંથી ૬૫,૦૦૦ સામાન્ય કેટેગરી માટે અને ૨૦,૦૦૦ અમેરિકામાં એડવાન્સ ડિગ્રી મેળવનાર વિદ્યાર્થીઓ માટે અનામત છે. ટેકનોલોજી, એન્જિનિયરિંગ અને સંશોધન ક્ષેત્રની કંપનીઓ આ વિઝા પર સૌથી વધુ નિર્ભર છે.
નવી ઇમિગ્રેશન નીતિઓ હેઠળ અમેરિકા હવે 'મેરિટ' અને 'હાઈ સેલેરી' ને વધુ મહત્વ આપી રહ્યું છે, જે લાંબા ગાળે પ્રતિભાશાળી ભારતીયો માટે ફાયદાકારક પણ સાબિત થઈ શકે છે.