નવી દિલ્હી: ભારતીય અર્થતંત્રને વધુ મજબૂત કરવા અને કંપનીઓના દેવા પેટે અટવાયેલા નાણાંની ઝડપી વસૂલાત માટે કેન્દ્ર સરકારે આજે રાજ્યસભામાં 'નાદારી અને નાદારી કોડ (સુધારા) બિલ, 2025' રજૂ કર્યું છે. કોર્પોરેટ બાબતોના રાજ્યમંત્રી હર્ષ મલ્હોત્રાએ આ બિલ રજૂ કરતા જણાવ્યું હતું કે, આ સુધારાનો મુખ્ય હેતુ વર્ષ 2016ના મૂળ કાયદામાં રહેલી અર્થઘટનની ખામીઓને દૂર કરવાનો અને નાદારીની પ્રક્રિયામાં થતો વિલંબ ઘટાડવાનો છે.

બેંકોના નફામાં ઐતિહાસિક ઉછાળો

ચર્ચા દરમિયાન ભાજપના સાંસદ ડૉ. રાધા મોહન દાસ અગ્રવાલે આંકડાકીય વિગતો આપતા જણાવ્યું હતું કે, વર્ષ 2016માં જ્યારે આ કાયદો અમલમાં આવ્યો ત્યારે બેંકોનું ગ્રોસ NPA (નબળી અસ્કયામતો) 11.18% જેટલું ઊંચું હતું, જે હવે ઘટીને માત્ર 2.05% પર આવી ગયું છે. ખાસ કરીને જાહેર ક્ષેત્રની બેંકોમાં NPA 14.58% થી ઘટીને 2% થઈ જવું એ મોટી સફળતા છે. વધુમાં, વર્ષ 2024-25 દરમિયાન વાણિજ્યિક બેંકોએ 4 લાખ કરોડ રૂપિયાનો રેકોર્ડબ્રેક નફો નોંધાવ્યો છે, જે આ કાયદાની સકારાત્મક અસર દર્શાવે છે.

વસૂલાત દરમાં નોંધપાત્ર સુધારો

સરકારી પક્ષે દલીલ કરી હતી કે અગાઉ તણાવગ્રસ્ત સંપત્તિઓમાંથી વસૂલાતનો દર માત્ર 15 થી 20% હતો, જે IBC (Insolvency and Bankruptcy Code) ફ્રેમવર્ક અમલમાં આવ્યા બાદ સુધરીને 36.6% થયો છે. ભારતનું વૈશ્વિક રેન્કિંગ પણ આ ક્ષેત્રમાં 136 થી સુધરીને 52 પર પહોંચ્યું છે, જે વિદેશી રોકાણકારો માટે વિશ્વાસનું પ્રતીક છે.

વિપક્ષના આકરા પ્રહારો

બીજી તરફ, કોંગ્રેસના સાંસદ રાજીવ શુક્લાએ સ્વીકાર્યું કે શરૂઆતમાં આ કાયદાએ સારા પરિણામો આપ્યા હતા, પરંતુ હવે આ સિસ્ટમ વિલંબ અને પારદર્શિતાના અભાવે નબળી પડી રહી છે. તેમણે નોકરીઓના રક્ષણ અને પારદર્શિતા અંગે ગંભીર ચિંતા વ્યક્ત કરી હતી. તૃણમૂલ કોંગ્રેસ (TMC) ના સુકેન્દુ શેખર રેએ આક્ષેપ કર્યો હતો કે, આ કાયદો ઉતાવળમાં લાવવામાં આવ્યો છે. તેમણે આંકડા આપતા કહ્યું કે છેલ્લા 9 વર્ષમાં આ કાયદામાં 6 મુખ્ય સુધારા અને નિયમોમાં 122 વખત ફેરફાર કરવામાં આવ્યા છે, જે દર્શાવે છે કે મૂળ માળખું ડિફોલ્ટિંગ કંપનીઓને છટકબારીઓ પૂરી પાડે છે.

નાદારી અને દેવાની આ જટિલ પ્રક્રિયાને વધુ સરળ અને પારદર્શક બનાવવાના સરકારના આ પ્રયાસ પર હવે દેશના આર્થિક નિષ્ણાતોની નજર ટકેલી છે. આ બિલ પસાર થવાથી કોર્પોરેટ જગત અને બેંકિંગ ક્ષેત્રમાં નવી સ્ફૂર્તિ આવવાની અપેક્ષા છે.