અંજુના (ગોવા):  ગોવાના અંજુના બીચ પર આવેલી લોકપ્રિય નાઈટક્લબ 'બિર્ચ બાય રોમિયો લેન'માં લાગેલી ભયાનક આગના કેસમાં મુખ્ય આરોપી લુથરા બ્રધર્સને કોર્ટમાંથી મોટી રાહત મળી છે. માપુસાની JMFC કોર્ટે ૨૫ લોકોના મોત માટે જવાબદાર મનાતા ગૌરવ લુથરા અને સૌરભ લુથરાને શરતી જામીન મંજૂર કર્યા છે. જોકે, અન્ય કાનૂની ગૂંચવણોને કારણે તેઓ તાત્કાલિક જેલની બહાર આવી શકશે કે કેમ તે અંગે હજુ સસ્પેન્સ યથાવત છે.

શું હતી એ કાળજું કંપાવનારી ઘટના?

આ ઘટનાએ સમગ્ર દેશને હચમચાવી દીધો હતો જ્યારે નાઈટક્લબમાં લાગેલી ભીષણ આગમાં ૨૫ લોકો જીવતા ભૂંજાયા હતા. મૃતકોમાં ક્લબનો આખો કિચન સ્ટાફ અને ચાર વિદેશી પ્રવાસીઓનો સમાવેશ થતો હતો. તપાસ દરમિયાન ચોંકાવનારો ખુલાસો થયો હતો કે ક્લબમાં ફાયર સેફ્ટીના સાધનોનો અભાવ હતો અને ઈમરજન્સી એક્ઝિટના રસ્તાઓ પણ બ્લોક હતા. આટલી મોટી બેદરકારીને કારણે અનેક પરિવારોએ પોતાના સ્વજનો ગુમાવ્યા હતા.

નકલી દસ્તાવેજો અને વિદેશ ભાગી જવાનું કાવતરું

તપાસ એજન્સીઓના જણાવ્યા અનુસાર, લુથરા બંધુઓએ નકલી ફાયર NOC અને ખોટા દસ્તાવેજોના આધારે ક્લબનું લાયસન્સ મેળવ્યું હતું. અકસ્માત સર્જાયા બાદ બંને ભાઈઓ પોલીસની ધરપકડથી બચવા માટે રાતોરાત થાઈલેન્ડ ભાગી ગયા હતા. લાંબી કાનૂની પ્રક્રિયા અને ઈન્ટરપોલની મદદ બાદ તેમને ભારત લાવવામાં આવ્યા અને કોલવેલ સેન્ટ્રલ જેલમાં ધકેલી દેવામાં આવ્યા હતા.

મુશ્કેલીઓ હજુ ઓછી થઈ નથી

કોર્ટે ભલે તેમને આ આગના કેસમાં ₹૫૦,૦૦૦ના વ્યક્તિગત બોન્ડ પર જામીન આપ્યા હોય, પરંતુ તેમની સામે લાયસન્સ કૌભાંડ અને છેતરપિંડીના અન્ય ગંભીર કેસો સેશન્સ કોર્ટમાં ચાલી રહ્યા છે. તાજેતરમાં જ સેશન્સ કોર્ટે તેમની અન્ય એક જામીન અરજી ફગાવી દીધી હતી. પોલીસનું કહેવું છે કે તેઓ લુથરા બ્રધર્સ વિરુદ્ધ વધુ મજબૂત પુરાવા એકઠા કરી રહ્યા છે જેથી પીડિત પરિવારોને ન્યાય મળી શકે.

ગોવાના આ પ્રખ્યાત ટુરિસ્ટ સ્પોટ પર બનેલી આ હોનારત બાદ પ્રશાસન હવે અન્ય નાઈટક્લબોમાં પણ સેફ્ટી ઓડિટને લઈને કડક બન્યું છે. લુથરા બંધુઓને મળેલી આ રાહત પીડિત પરિવારો માટે આંચકાજનક સાબિત થઈ શકે છે.