નવી દિલ્હી:  પશ્ચિમ એશિયા અને મધ્ય પૂર્વમાં ફાટી નીકળેલા યુદ્ધને કારણે સમગ્ર વિશ્વમાં તેલની તંગીના એંધાણ દેખાઈ રહ્યા છે, પરંતુ ભારત સરકારે દેશવાસીઓને મોટી રાહત આપતા જાહેરાત કરી છે કે ચિંતા કરવાની કોઈ જરૂર નથી. પેટ્રોલિયમ અને કુદરતી ગેસ મંત્રાલયના સંયુક્ત સચિવ સુજાતા શર્માએ બુધવારે સ્પષ્ટપણે જણાવ્યું હતું કે ભારત પાસે આગામી બે મહિના એટલે કે 60 દિવસ સુધી ચાલે તેટલો ક્રૂડ ઓઈલનો પૂરતો ભંડાર ઉપલબ્ધ છે. સોશિયલ મીડિયા પર ચાલી રહેલી તેલની અછતની વાતોને સરકારે પાયાવિહોણી અફવા ગણાવી છે અને ખાતરી આપી છે કે દેશની રિફાઇનરીઓ અત્યારે ફુલ કેપેસિટી સાથે કામ કરી રહી છે.

વૈશ્વિક બજારમાં તેલની કિંમતોમાં લાગેલી આગની અસર ભારતીય ગ્રાહકો સુધી ન પહોંચે તે માટે સરકારે કમર કસી છે. સુજાતા શર્માએ માહિતી આપી હતી કે બે મહિના પહેલા જે બ્રેન્ટ ક્રૂડ $70 પ્રતિ બેરલ હતું, તે આજે વધીને $100 ને પાર કરી ગયું છે. આમ છતાં, ભારત સરકારે એક્સાઈઝ ડ્યુટીમાં ઘટાડો કરીને અને અન્ય નાણાકીય પગલાં ભરીને સ્થાનિક બજારમાં પેટ્રોલ અને ડીઝલના ભાવ સ્થિર રાખ્યા છે. ઉલ્લેખનીય છે કે, એપ્રિલ 2022 થી ભાવમાં કોઈ મોટો વધારો કરવામાં આવ્યો નથી, જે વૈશ્વિક કટોકટી વચ્ચે ભારતીય અર્થતંત્ર માટે એક મજબૂત કવચ સમાન છે.

સરકારે તેલ માર્કેટિંગ કંપનીઓ ને પણ આદેશ આપ્યા છે કે પુરવઠો ખોરવાય નહીં તેનું ખાસ ધ્યાન રાખવામાં આવે. સ્થાનિક જરૂરિયાતોને પ્રાથમિકતા આપવા માટે સરકારે ATF (એરક્રાફ્ટ ફ્યુઅલ) અને ડીઝલની નિકાસ પર વધારાની ડ્યુટી પણ લાદી છે, જેથી દેશનો માલ દેશમાં જ રહે. મંત્રાલયે નાગરિકોને ખાસ અપીલ કરી છે કે તેઓ પેટ્રોલ પંપો પર ભીડ ન કરે કે ગભરાટમાં આવીને તેલનો સંગ્રહ ન કરે. ભારતનું 'ક્રૂડ મેનેજમેન્ટ' અત્યારે એટલું સજ્જ છે કે યુદ્ધ લાંબુ ખેંચાય તો પણ સામાન્ય જનતાના ખિસ્સા પર તેની તાત્કાલિક અસર નહીં પડે.