મુંબઈ:  મુંબઈના વ્યસ્ત એરપોર્ટ પર મુસાફરી કરનારા હવાઈ મુસાફરો માટે હવે 'વેઇટિંગ ટાઈમ' કંટાળાજનક નહીં પણ સુવિધાજનક બનવા જઈ રહ્યો છે. અદાણી એરપોર્ટ હોલ્ડિંગ્સ લિમિટેડ  એ ક્વિક કોમર્સ જાયન્ટ 'બ્લિંકિટ' સાથે હાથ મિલાવીને એક અનોખી સેવા શરૂ કરી છે. આ પહેલ હેઠળ, મુસાફરો હવે એરપોર્ટની અંદર જ બ્લિંકિટ એપ દ્વારા જરૂરી સામાન મંગાવી શકશે. ભલે તમે ઘરેથી ફોનનું ચાર્જર લેવાનું ભૂલી ગયા હો, ફ્લાઇટમાં વાંચવા માટે પુસ્તક જોઈતું હોય કે પછી અચાનક ભૂખ લાગે, આ બધું જ હવે માત્ર એક ક્લિક પર ઉપલબ્ધ થશે.

હાલમાં આ હાઈ-ટેક સેવા મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટના ટર્મિનલ-2 પર ડોમેસ્ટિક ફ્લાઇટ્સ માટે શરૂ કરવામાં આવી છે. મુસાફરો ઓર્ડર આપશે એટલે તાલીમબદ્ધ ગ્રાઉન્ડ સ્ટાફ થોડી જ મિનિટોમાં સામાન લઈને બોર્ડિંગ ગેટ, લાઉન્જ કે ફૂડ કોર્ટ સુધી પહોંચી જશે. ખાસ વાત એ છે કે આ સુવિધાથી એરપોર્ટની સુરક્ષા કે અન્ય કામગીરીમાં કોઈ ખલેલ પડશે નહીં. મુસાફરોની સુવિધા માટે પેકેજ્ડ પાણી, જ્યુસ અને પર્સનલ કેર પ્રોડક્ટ્સ પણ ટર્મિનલના માન્ય સ્ટોકમાંથી જ પૂરા પાડવામાં આવશે, જે સુરક્ષા પ્રોટોકોલનું સંપૂર્ણ પાલન કરે છે.

અદાણી એરપોર્ટ હોલ્ડિંગ્સના પ્રવક્તાના જણાવ્યા અનુસાર, આ સેવા એરપોર્ટ અનુભવને સંપૂર્ણપણે ડિજિટલ અને 'પેસેન્જર-સેન્ટ્રિક' બનાવવાની દિશામાં એક મોટું પગલું છે. આ સુવિધાને કારણે મુસાફરોએ હવે એરપોર્ટ પર મોંઘી દુકાનો શોધવાની કે લાંબી લાઈનોમાં ઊભા રહેવાની જરૂર નહીં પડે. બ્લિંકિટની એન્ટ્રીથી એરપોર્ટ હવે માત્ર મુસાફરીનું કેન્દ્ર નહીં, પણ સ્માર્ટ શોપિંગનું હબ પણ બની ગયું છે. મુંબઈના આ સફળ પ્રયોગ બાદ આગામી સમયમાં દેશના અન્ય અદાણી સંચાલિત એરપોર્ટ પર પણ આ સેવા શરૂ કરવામાં આવે તેવી પૂરેપૂરી શક્યતા છે.