બાર્સેલોના: ફિફા વર્લ્ડ કપ ૨૦૨૬ની તૈયારીઓ વચ્ચે રમાયેલી સ્પેન અને ઈજિપ્ત વચ્ચેની મૈત્રીપૂર્ણ ફૂટબોલ મેચમાં ખેલદિલીને બદલે કટ્ટરતા અને જાતિવાદના વરવા દ્રશ્યો જોવા મળ્યા હતા. સ્પેનિશ ફૂટબોલ ટીમના યુવા સનસનાટીભર્યા ખેલાડી લામીન યમાલે સ્ટેડિયમમાં પ્રેક્ષકો દ્વારા કરવામાં આવેલા ધાર્મિક અપમાન સામે મજબૂત અવાજ ઉઠાવ્યો છે. યમાલે સોશિયલ મીડિયા પર સ્પષ્ટ શબ્દોમાં જણાવ્યું છે કે સ્ટેડિયમમાં ધર્મનો મજાક ઉડાવવો તે અસ્વીકાર્ય અને અજ્ઞાનતાની નિશાની છે.

શું હતી સમગ્ર ઘટના?

૩૧ માર્ચના રોજ આરસીડીઈ (RCDE) સ્ટેડિયમ ખાતે રમાયેલી આ મેચ ૦-૦ થી ડ્રો રહી હતી, પરંતુ મેદાન પરની રમત કરતા સ્ટેન્ડમાં બેઠેલા કેટલાક ચાહકોની હરકત વધુ ચર્ચામાં રહી. મેચ શરૂ થાય તે પહેલા જ્યારે ઈજિપ્તનું રાષ્ટ્રગીત વાગી રહ્યું હતું, ત્યારે કેટલાક પ્રેક્ષકોએ સીટીઓ વગાડીને તેનું અપમાન કર્યું હતું. ત્યારબાદ, મેચ દરમિયાન ભીડના એક હિસ્સાએ "જો તમે કૂદકો નહીં લગાવો, તો તમે મુસ્લિમ છો" જેવા વાંધાજનક નારા લગાવ્યા હતા.

લામીન યમાલનો જડબાતોડ જવાબ

મોરોક્કન પૃષ્ઠભૂમિ ધરાવતા ૧૮ વર્ષીય મુસ્લિમ ફૂટબોલર લામીન યમાલે આ ઘટનાની કડક ટીકા કરી છે. તેણે પોતાની ઈન્સ્ટાગ્રામ પોસ્ટમાં લખ્યું, "હું મુસ્લિમ છું, અલ્હમદુલિલ્લાહ. ગઈકાલે જે નારા લાગ્યા તે કોઈ હરીફ ટીમને ઉદ્દેશીને હોય તો પણ એક મુસ્લિમ તરીકે તે મને ઠેસ પહોંચાડનારા છે. ફૂટબોલ એકતા અને આદર માટે છે, કોઈના ધર્મ કે શ્રદ્ધાનો મજાક ઉડાવવા માટે નહીં. આવા લોકો સ્ટેડિયમમાં પોતાની જાતિવાદી માનસિકતા પ્રદર્શિત કરી રહ્યા છે."

સોશિયલ મીડિયા પર ભારે આક્રોશ

આ ઘટનાનો વિડિયો વાયરલ થયા બાદ ફૂટબોલ પ્રેમીઓએ સ્પેનિશ ફેન્સની આ હરકતની ભારે નિંદા કરી છે. ઘણા યુઝર્સે લખ્યું છે કે ફિફાએ આવા કિસ્સાઓમાં કડક કાર્યવાહી કરવી જોઈએ જેથી રમતની પવિત્રતા જળવાઈ રહે. ખાસ કરીને જ્યારે દુનિયા ૨૦૨૬ના વર્લ્ડ કપની રાહ જોઈ રહી છે, ત્યારે યુરોપના મેદાનો પર જોવા મળતો આવો જાતિવાદ ચિંતાનો વિષય છે.

યમાલની આ નીડર પ્રતિક્રિયાએ સાબિત કરી દીધું છે કે તે માત્ર મેદાન પર જ નહીં, પણ મેદાનની બહાર પણ એક સાચો હીરો છે. તેણે સ્પષ્ટ કર્યું છે કે તે પોતાની ઓળખ પર ગર્વ અનુભવે છે અને રમતગમતમાં નફરતને કોઈ સ્થાન નથી. હવે જોવાનું એ રહેશે કે સ્પેનિશ ફૂટબોલ ફેડરેશન આ મામલે જવાબદાર પ્રેક્ષકો સામે શું પગલાં લે છે.