અમેરિકન સ્પેસ એજન્સી નાસા દ્વારા લગભગ ૫૪ વર્ષના લાંબા અંતરાલ પછી ફરી એકવાર માનવીને ચંદ્ર પર મોકલવાની ઐતિહાસિક શરૂઆત કરવામાં આવી છે. ગુરુવારે સવારે ભારતીય સમય મુજબ ૪:૦૫ વાગ્યે ફ્લોરિડાના કેનેડી સ્પેસ સેન્ટર ખાતેથી આર્ટેમિસ-૨ મિશન સફળતાપૂર્વક લોન્ચ કરવામાં આવ્યું છે. નાસાના આ પ્રથમ માનવસહિત આર્ટેમિસ મિશનમાં ક્રિસ્ટીના કોચ, વિક્ટર ગ્લોવર, રીડ વાઈઝમેન અને જેરેમી હેન્સન એમ ચાર અવકાશયાત્રીઓને એસએલએસ રોકેટ દ્વારા અવકાશમાં રવાના કરવામાં આવ્યા છે. આ મિશન ૧૦ દિવસ સુધી ચાલશે, જેમાં અવકાશયાત્રીઓ ચંદ્રની પરિક્રમા કરીને પૃથ્વી પર પરત ફરશે. આ ઐતિહાસિક સફર દરમિયાન તેઓ પૃથ્વીથી લગભગ ૪.૦૬ લાખ કિલોમીટર દૂર જશે, જે અત્યાર સુધીની કોઈપણ માનવસહિત અવકાશ યાત્રામાં સૌથી વધુ અંતર માનવામાં આવે છે. આંતરરાષ્ટ્રીય સ્પેસ એજન્સીઓએ નાસાની આ અદભુત સિદ્ધિને વધાવી લીધી છે.