મનીલા, તા.૨: ઈરાન અને ઈઝરાયલ વચ્ચે ચાલી રહેલા ભીષણ યુદ્ધની અસરો હવે છેક દક્ષિણ-પૂર્વ એશિયા સુધી પહોંચી છે. મધ્ય પૂર્વમાં પ્રવર્તી રહેલી અસ્થિરતાને કારણે આંતરરાષ્ટ્રીય ફ્લાઈટ શેડ્યૂલ ખોરવાઈ જતાં ફિલિપાઈન્સમાં ફસાયેલા હજારો વિદેશી પ્રવાસીઓ માટે ત્યાંની સરકારે માનવીય અભિગમ અપનાવ્યો છે. ફિલિપાઈન્સ સરકારે જાહેરાત કરી છે કે ફસાયેલા વિદેશી નાગરિકો માટે વિઝા રાહતની મુદત હવે ૧ મે, ૨૦૨૬ સુધી લંબાવવામાં આવી છે.
દંડ અને કાનૂની ગૂંચવણોમાંથી મુક્તિ
ન્યાય સચિવ ફ્રેડરિક વિડા દ્વારા હસ્તાક્ષરિત 'ડિપાર્ટમેન્ટ ઓર્ડર ૨૧૯' મુજબ, જે પ્રવાસીઓના વિઝા અથવા રોકાણની અવધિ ૨૮ ફેબ્રુઆરીએ પૂર્ણ થઈ ગઈ છે, તેમને આ નવા આદેશનો સીધો લાભ મળશે. અગાઉ આ રાહત ૧ એપ્રિલના રોજ સમાપ્ત થવાની હતી, પરંતુ યુદ્ધના કારણે ફ્લાઈટ્સની મર્યાદિત ઉપલબ્ધતા અને સતત રદ થતા વિમાનોને જોતા સરકારે મુદત વધારવાનો નિર્ણય લીધો છે. આ પગલાથી પ્રવાસીઓને 'ઓવરસ્ટે' (મર્યાદા કરતા વધુ રોકાણ) માટે લાગતા મોટા દંડ અને કાનૂની કાર્યવાહીમાંથી બચાવી શકાશે.
વૈશ્વિક હવાઈ ટ્રાફિક પર યુદ્ધનો પંજો
મધ્ય પૂર્વ એ વૈશ્વિક હવાઈ ટ્રાફિકનો લગભગ ૧૪% હિસ્સો ધરાવે છે. ઈરાન-ઈઝરાયલ સંઘર્ષને કારણે આ ક્ષેત્રના હવાઈ માર્ગો જોખમી બન્યા છે, જેના કારણે વિશ્વભરની એરલાઈન્સ પોતાની ફ્લાઈટ્સ રદ કરી રહી છે અથવા રૂટ બદલી રહી છે. ફિલિપાઈન્સના અધિકારીઓએ જણાવ્યું હતું કે, "ઘણા વિદેશી નાગરિકો પોતાના વતન જવા ઈચ્છે છે પરંતુ ફ્લાઈટ ન મળવાને કારણે લાચાર છે. તેમને આર્થિક નુકસાન ન થાય તે માટે આ છૂટછાટ આપવામાં આવી છે."
પ્રવાસન ક્ષેત્ર પર નજર
૭,૦૦૦થી વધુ ટાપુઓ ધરાવતું ફિલિપાઈન્સ પ્રવાસીઓ માટે માનીતું સ્થળ છે. જોકે, હાલની સ્થિતિમાં મુસાફરીના લોજિસ્ટિક્સ અને સલામતી સૌથી મોટો પડકાર બની રહ્યા છે. સરકારની આ જાહેરાતથી ખાસ કરીને તેવા પ્રવાસીઓને રાહત મળી છે જેઓ યુદ્ધગ્રસ્ત વિસ્તારો અથવા તેના પડોશી દેશોના વતની છે અને હાલ ફિલિપાઈન્સમાં રોકાયેલા છે. સરકાર સતત સ્થિતિ પર નજર રાખી રહી છે જેથી જરૂર પડ્યે વધુ પગલાં ભરી શકાય.