ટોરોન્ટો, તા.૨: કેનેડામાં વસતા ભારતીય સમુદાય અને ભારત-કેનેડાના રાજદ્વારી સંબંધો માટે એક મહત્વના સમાચાર આવ્યા છે. વરિષ્ઠ ભારતીય રાજદ્વારી મહાવીર સિંઘવીએ ટોરોન્ટોમાં ભારતના નવા કોન્સ્યુલ જનરલ (CGI) તરીકે સત્તાવાર રીતે કાર્યભાર સંભાળી લીધો છે. લાંબા સમયથી ખાલી પડેલા આ મહત્વના પદ પર સિંઘવીની નિમણૂક એવા સમયે થઈ છે જ્યારે બંને દેશો વચ્ચે આર્થિક અને વ્યૂહાત્મક સહયોગ વધારવાની તાતી જરૂરિયાત છે.
બહુમુખી પ્રતિભા ધરાવતા કુશળ રાજદ્વારી
મહાવીર સિંઘવી માત્ર એક રાજદ્વારી જ નથી, પરંતુ તેઓ જ્ઞાનનો ભંડાર છે. તેઓ ચાર્ટર્ડ એકાઉન્ટન્ટ (CA), કંપની સેક્રેટરી (CS), વકીલ અને MBA જેવી ઉચ્ચ વ્યાવસાયિક લાયકાતો ધરાવે છે. તેમણે ઓક્સફર્ડ યુનિવર્સિટીમાંથી આંતરરાષ્ટ્રીય કાયદામાં માસ્ટર્સ કર્યું છે. વિદેશ મંત્રાલયમાં વધારાના સચિવ તરીકે બઢતી પામેલા સિંઘવી પાસે નાણાકીય, કાનૂની અને વ્યૂહાત્મક બાબતોનો બહોળો અનુભવ છે, જે ટોરોન્ટો જેવા આર્થિક કેન્દ્રમાં ભારત માટે ખૂબ જ ઉપયોગી સાબિત થશે.
ભારત-કેનેડા સંબંધોમાં નવા અધ્યાયની શરૂઆત
ટોરોન્ટો સ્થિત ભારતીય કોન્સ્યુલેટે સોશિયલ મીડિયા પર આ નિમણૂકની જાહેરાત કરતા જણાવ્યું હતું કે, સિંઘવીની એન્ટ્રી ભારત-કેનેડા સંબંધોને ઉન્નત બનાવવા માટે એક નિર્ણાયક ક્ષણે થઈ છે. તેમનું મુખ્ય ધ્યાન વેપાર, ટેકનોલોજી, શિક્ષણ અને ઇનોવેશનમાં બંને દેશો વચ્ચેની ભાગીદારીને વધુ ગાઢ બનાવવા પર રહેશે. તેઓ કેનેડિયન હિસ્સેદારો અને વિશાળ ભારતીય ડાયસ્પોરા (પ્રવાસી ભારતીયો) સાથે મળીને પરસ્પર વિશ્વાસ મજબૂત કરવા માટે આતુર છે.
કપિધ્વજ પ્રતાપ સિંહ પાસેથી લીધો ચાર્જ
આ પહેલા, વરિષ્ઠ રાજદ્વારી કપિધ્વજ પ્રતાપ સિંહ કાર્યકારી કોન્સ્યુલ જનરલ તરીકે આ જવાબદારી સંભાળી રહ્યા હતા. હવે મહાવીર સિંઘવીના આગમનથી કોન્સ્યુલેટને એક સ્થાયી અને અનુભવી નેતૃત્વ મળ્યું છે. સિંઘવીની આર્થિક અને વૈશ્વિક બાબતોની સમજ કેનેડામાં ભારતના હિતોને સુરક્ષિત કરવા અને ભારતીય સમુદાયની સમસ્યાઓના ઉકેલ માટે નવી દિશા આપશે તેવું માનવામાં આવે છે.
ટોરોન્ટોમાં ભારતીય વાણિજ્ય દૂતાવાસ હવે સિંઘવીના માર્ગદર્શન હેઠળ ભારતની 'સોફ્ટ પાવર' અને આર્થિક તાકાતને કેનેડાની ધરતી પર વધુ મજબૂતીથી રજૂ કરશે.