પુણે: મહારાષ્ટ્રના પુણે શહેરમાં ગુરુવારે બપોરે કુદરતનો પ્રકોપ જોવા મળ્યો હતો. શહેરના અનેક વિસ્તારોમાં વાદળ ફાટ્યું હોય તેવી સ્થિતિ સર્જાતા જનજીવન સંપૂર્ણપણે અસ્તવ્યસ્ત થઈ ગયું હતું. કોંધવા, હડપસર અને ઉત્તમનગર જેવા વિસ્તારોમાં મેઘરાજાએ એવી બેટિંગ કરી કે જોતજોતામાં રસ્તાઓ પર કેડ સમાન પાણી ભરાઈ ગયા હતા. આ અચાનક આવેલા પૂર જેવા પાણીમાં અનેક વાહનો ફસાયેલા અને ડૂબેલા જોવા મળ્યા હતા, જેના વીડિયો હાલ સોશિયલ મીડિયા પર ધૂમ મચાવી રહ્યા છે.
માત્ર ૬૦ મિનિટમાં જળબંબાકાર
આંકડાઓ મુજબ, પુણેના વિવિધ વિસ્તારોમાં માત્ર એક કલાકના ગાળામાં જ અત્યંત ભારે વરસાદ નોંધાયો હતો. ખડકવાસલામાં ૯૯ મીમી અને સિંહગઢ રોડ પર ૯૪.૮ મીમી વરસાદ ખાબકતા પરિસ્થિતિ ગંભીર બની હતી. આ ઉપરાંત કોથરુડમાં ૬૪.૮ મીમી અને શિવાજીનગરમાં ૪૮.૪ મીમી વરસાદે પાલિકાની પ્રી-મોન્સૂન કામગીરીની પોલ ખોલી નાખી હતી. ટ્રાફિક જામ અને પાણી ભરાવાને કારણે મુસાફરો કલાકો સુધી રસ્તા પર અટવાઈ પડ્યા હતા.
હવામાન વિભાગની ગંભીર ચેતવણી
ભારતીય હવામાન વિભાગ (IMD) એ આગામી ૪૮ કલાક માટે મહારાષ્ટ્રના અનેક ભાગોમાં વાવાઝોડા અને ભારે વરસાદની આગાહી કરી છે. પુણે સહિત નાસિક, જલગાંવ અને છત્રપતિ સંભાજીનગર જેવા જિલ્લાઓ માટે 'ઓરેન્જ એલર્ટ' જારી કરવામાં આવ્યું છે, જેનો અર્થ છે કે તંત્ર અને જનતાએ કોઈપણ પરિસ્થિતિ માટે તૈયાર રહેવું પડશે. મુંબઈ સિવાયના લગભગ તમામ પશ્ચિમ મહારાષ્ટ્ર અને વિદર્ભ ક્ષેત્રમાં 'યલો એલર્ટ' જાહેર કરવામાં આવ્યું છે.
આગામી દિવસોમાં પણ સંકટ યથાવત
શુક્રવાર માટે પણ પરભણી, હિંગોલી અને જાલના જેવા વિસ્તારોમાં ભારે વરસાદની સંભાવના વ્યક્ત કરવામાં આવી છે. હવામાન વિભાગે નાગરિકોને બિનજરૂરી બહાર ન નીકળવા અને સુરક્ષિત સ્થળે રહેવા અપીલ કરી છે. પુણેની આ સ્થિતિએ ચોમાસાના આગમન પહેલા જ વહીવટી તંત્રને સાબદું કરી દીધું છે. શહેરમાં ઠેર-ઠેર ભરાયેલા પાણીના નિકાલ માટે હાલમાં મ્યુનિસિપલ કોર્પોરેશનની ટીમો કાર્યરત છે.