નવી દિલ્હી, : પશ્ચિમ એશિયામાં ઈઝરાયેલ અને ઈરાન વચ્ચે વધી રહેલા સંઘર્ષની વચ્ચે ભારત સરકારે પોતાના નાગરિકોની સુરક્ષા માટે 'મેગા રેસ્ક્યુ' અભિયાન તેજ કર્યું છે. વિદેશ મંત્રાલય (MEA) એ ગુરુવારે સત્તાવાર રીતે જાહેર કર્યું છે કે ઈરાનમાં ફસાયેલા ૧,૨૦૦ થી વધુ ભારતીય નાગરિકોને સફળતાપૂર્વક બહાર કાઢી લેવામાં આવ્યા છે. આ ઓપરેશનમાં પડોશી દેશો આર્મેનિયા અને અઝરબૈજાનના જમીની માર્ગોનો ઉપયોગ કરીને ભારતીયોને સુરક્ષિત કોરિડોર પૂરો પાડવામાં આવ્યો છે.
વિદ્યાર્થીઓની સુરક્ષા પર વિશેષ ધ્યાન
રાષ્ટ્રીય રાજધાનીમાં આયોજિત એક બ્રીફિંગ દરમિયાન વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે, "અત્યાર સુધીમાં આશરે ૧,૨૦૦ ભારતીયોને ઈરાનમાંથી બહાર કાઢવામાં આવ્યા છે, જેમાં ૮૪૫ જેટલા વિદ્યાર્થીઓનો સમાવેશ થાય છે. આ પૈકી ૯૯૬ લોકોને આર્મેનિયા અને ૨૦૪ લોકોને અઝરબૈજાન ખસેડવામાં આવ્યા છે." ભારતીય મિશન અને સ્થાનિક સત્તાવાળાઓના સંકલનથી આ તમામ નાગરિકોને ભારત પરત લાવવા માટે પરિવહન અને રહેવાની વ્યવસ્થા કરવામાં આવી રહી છે.
વડાપ્રધાન મોદીની વૈશ્વિક નેતાઓ સાથે મંત્રણા
પશ્ચિમ એશિયાની વણસતી પરિસ્થિતિ અંગે વડાપ્રધાન નરેન્દ્ર મોદી સતત વૈશ્વિક નેતાઓના સંપર્કમાં છે. ૨૮ માર્ચના રોજ પીએમ મોદીએ સાઉદી અરેબિયાના ક્રાઉન પ્રિન્સ મોહમ્મદ બિન સલમાન સાથે ટેલિફોનિક વાતચીત કરી હતી. આ મંત્રણા દરમિયાન પશ્ચિમ એશિયામાં ઊર્જા માળખા પર થતા હુમલાઓની આકરી નિંદા કરવામાં આવી હતી અને દરિયાઈ વેપારના માર્ગો (શિપિંગ લેન) ને સુરક્ષિત રાખવા અંગે ચર્ચા થઈ હતી. ભારત આ સંઘર્ષમાં શાંતિ અને સુરક્ષા જાળવવા માટે મધ્યસ્થી અને મુત્સદ્દીગીરી પર ભાર મૂકી રહ્યું છે.
૬ લાખ મુસાફરોની ભારત વાપસી
યુએસ-ઈઝરાયેલ-ઈરાન સંઘર્ષ હવે બીજા મહિનામાં પ્રવેશી રહ્યો છે ત્યારે મધ્ય પૂર્વના દેશોમાંથી અત્યાર સુધીમાં ૬ લાખથી વધુ મુસાફરો ભારત પરત ફર્યા છે. વિદેશ મંત્રાલયે સ્પષ્ટ કર્યું છે કે દરેક ભારતીય નાગરિકની સુરક્ષા એ સરકારની ટોચની અગ્રતા છે અને જરૂર પડ્યે વધુ રેસ્ક્યુ ફ્લાઈટ્સ કે જમીની માર્ગોનો ઉપયોગ કરવામાં આવશે. ભારતીય દૂતાવાસોને ચોવીસ કલાક હેલ્પલાઈન ચલાવવા અને નાગરિકોને પળેપળની માહિતી આપવા આદેશ અપાયા છે.
આ રેસ્ક્યુ ઓપરેશન ભારતની મજબૂત વિદેશ નીતિ અને સંકટ સમયે પોતાના નાગરિકોની વહારે આવવાની પ્રતિબદ્ધતાનો વધુ એક પુરાવો છે.